COVALIMA, 06 Fevreiru 2023 (TATOLI)–Governu liuhosi Vise-Ministra Solidariedade Sosial no Inkluzaun (MSSI), Signi Chandrawati Verdial, introdús implementasaun programa bolsa da mãe jerasaun foun ba autoridade sira iha Covalima.
“Ha’u aproveita vizita ida-ne’e esplika ita-nia programa bolsa da mãe jerasaun foun, iha tempu badak ennttre semana ida ka rua nia-laran sei hala’o iha Covalima ba xefe suku sira iha-ne’e. Ha’u aproveita introdús programa ne’e ba sira bainhira ita-nia, komunidade hakbesik ba programa ne’e, sira hatene no ita-nia tékniku hosi MSSI sei destaka mai kada postu saúde hodi halo rejistu bolsa da mãe jerasaun foun,” Vise Ministra Solidariedade Sosial no Inkluzaun (MSSI), Signi Chandrawati Verdial,, hateten ba jornalista sira hafoinhala’o enkontru ho autoridade Covalima iha salaun AMC, Sukaer Laran, segunda ne’e.
Durante hala’o enkontru ho administradór postu administrativu ho xefe suku sira, autoridade hirak ne’e mós hato’o preokupasaunkona-ba prosesu atu trata Billete Identidade (BI) ba idozu sira-nian, tanba atu trata BI ne’e susar tebes.
Hatán ba preokupasaun ne’e, Vise ministra ne’e informa iha tempu badak Ministériu Administrasaun Estatal (MAE), Ministériu Justisa (MJ) ho Ministériu Solidariedade Sosial no Inkluzaun (MSSI) sei asina akordu atu fasilita sira atu asesu Billete Identidade.
“Ita sei asina akordu, iha tempu badak ajuda notariadu hodi fasilita komunidade iha área rurál trata BI ho lalais liu,” nia dehan.
Benefisíariu sira-ne’ebé forma iha banku atu foti osan, parte hosi banku sei husu Kartaun Eleitorál (KE) no Billete Identidade (BI), tanba ne’e kobertura BI territóriu nasionál seidauk másímu, nune’e difikulta benefisáriu sira atu hetan sira-nia direitu.
“Ohin mai iha ne’e informa katak servisu balun ita hala’o hela kona-ba akordu interministeriál, nune’e servisu hamutuk bele atribui lalais BI ba benefisíariu sira-ne’ebé benefísiu hosi programa ministériu,” nia hateten.
Bainhira mak atu implementa, nia dehan, espera iha fulan-marsu nia laran, ema bele rejistu ona nune’e fulan-juñu sira bele hetan ona sira-nia direitu osan liu-liu ba inan isin-rua sira no labarik sira.
Iha tinan 2023, Governu sei implementa programa bolsa da mãe jerasaun foun, iha munisípiu haat (4) hanesan munisípiu Covalima, Viqueque, Manatutu no Liquiça.
Antes ne’e, iha loron 15 fulan-novembru tinan 2022 ne’e Parlamentu Nasionál aprova Orsamentu Jerál Estadu tinan 2023 ho montante $30,717,108 ba Ministériu Solidariedade Sosial no Inkluzaun (MSSI) iha faze espesialidade.
Jornalista : Celestina Teles
Editór : Cancio Ximenes
