DILI,06 fevereiru 2023 (TATOLI) – Diretór Nasionál Saúde Públika iha Ministériu Saúde, Frederico Bosco, relata iha fulan janeiru, ministériu rejista pasiente dengue hamutuk 84 husi Munisípiu Dili, Baucau, Liquiça, Manufahi, Bobonaro no Viqueuqe.
“Iha fulan janeiru, ita nia fasilidade saúde sira iha munisípiu neen rejista pasiente dengue hamutuk 84, husi númeru ne’e, munisípiu Dili hamutuk 37, Baucau 32, Liquiça neen, Manufahi rua, Bobonaro rua no Viqueque lima. Enkuantu ba munisípiu sira seluk ita la iha kazu”, Diretór Frederico Bosco dehan ba TATOLI iha nia kna’ar fatin Caicoli, ohin.
Nia informa, iha fulan janeiru, MS la rejista kazu mate tanba pasiente sira ne’e hotu ba fasilidade saúde no hetan atendimentu di’ak husi profisionál saúde no rekuperadu hotu.
“Husi pasiente sira ne’e kazu kamaan hamutuk 59, kazu moderadu 22 no kazu gravea tolu, husi grave ne’e halo tratamentu intensivu iha Hospitál Nasionál Guido Valadares”. nia esplika.
Nia subliña, pasiente hirak ne’e, maioria afetadu husi idade 1 to’o 14, hamutuk 57, husi idade 15 too 24 hamutuk 18 no menus husi tinan ida iha na’in hitu no idade 24 ba leten iha na’in rua.
“Kona-ba aimoruk fomigasaun, ita nafatin sufisiente hela tanba preparasaun ida ne’e dezde iha 2022 bainhira tama ona fulan agostu no setembru ita halo ona atividade prevensaun nian, ita halo mós prevensaun ba kontrolu vetór mak ita distribui abate ba kada uma kain sira, bianhira to’o fulan dezembru ita relata kazu ida ka rua depois ita halo kedas intervensaun ho fomigasaun ba komunidade sira área risku”, nia konklui.
Jornalista : Felicidade Ximenes
Editór : Zezito Silva
