DILI, 06 fevereiru 2023 (TATOLI)—Embaixadór Korea Súl iha Timor Leste, Shin Mantaek, hateten Embaixadór Korea sei esforsu makaas hodi halo prosesu identifikasaun ba traballadór timoroan ilegal sira-ne’ebé servisu iha korea.
“Hanesan foin Embaixadór atu mai assina kargu entaun, ha’u iha hela prosesu identifikasaun ba traballadór illegál sira-ne’e. Maibé ha’u fiar katak ha’u sei halo esforsu sira atu prevene númeru sira sa’e makaas. Nune’e bele nafatin mantein relasaun ne’ebé di’ak entre Timor-Leste ho Korea no labele hetan impaktu hosi traballadór ne’ebé legál,” Shin Mantaek hateten ba jornalista sira, hafoin ramata enkontru ho Xefe Estadu iha Palásiu Prezidensiál Bairu Pite, segunda ne’e.
Nia dehan, liuhosi servisu hamutuk ho parseiru sira, nune’e bele kontribui ba dezenvolvimentu nasaun rua nian.
“Ha’u labele promete deadline ne’ebé iha maibé ha’u fiar servisu hamutuk ho parseiru parte ne’ebé relevante iha asuntu ida-ne’ebé oinsá nafatin mantein programa ida-ne’e sei la’o di’ak nafatin iha futuru hodi kontribui ba dezenvolvimentu rai rua nian,” nia dehan.
Antes ne’e Sekretáriu Estadu Formasaun Profisionál no Empregu, Alarico do Rosário, rekoñese traballadór barak mak serbisu ilegál iha Korea Súl bele fó impaktu ba kuota, tanba ne’e nia husu traballadór sira atu hakbesik-an ba reprezentante Timor-Leste iha Korea Súl atu buka informasaun.
“Husu ba traballadór timoroan ne’ebé daudaun serbisu ilegá , voluntariamente hakbesik-an ba iha Embaixada Timor-Leste atu rejista-an, tanba se lae bele fó impaktu ladún di’ak ba sira-nia pesoál tanba ema bele deporta no labele hetan oportunidade serbisu tan iha Korea,” nia hateten.
Bazea ba dadus hosi SEFOPE, traballadór timor oan ne’ebé serbisu iha Korea Súl hahú hosi tinan 2009 to’o 2020 hamutuk 3.696 ne’ebé serbisu iha área peska, fábrika no agrikultura, ho totál traballadór mane ne’ebé serbisu iha área peska hamutuk 2.193 no feto ne’ebé mak traballadór timoroan iha Korea Súl ne’ebé ramata ona kontratu iha tinan 2021 ne’e hamutuk na’in-86 no posibilidade sei aumenta.
Jornalista : Osoria Marques
Editór : Cancio Ximenes
