COVALIMA, 06 fevereiru 2023 (TATOLI)–Diretór PNDS Covalima, Filipe Cardoso hateten, Progresu konstruisaun Uma Naroman ba Povu (UNP) faze daruak tinan 2022 nian ne’e iha unidade 278 atinje ona 10%.
“Progresu fíziku implementa UNP faze daruak iha tinan fiskál 2022, ho unidade 278 ita foin atinje 10% ne’ebé agora daudaun tama iha faze implementasaun,” Filipe Cardoso relata ba Agência Tatoli, iha nia kna’ar fatin, Sukaer Laran, segunda ne’e.
Konstrusaun UNP faze daruak foin atinje 10% ne’e, nia dehan, tanba balun foin mobiliza materiál no balun konstrusaun to’o ona fui sinta jerál, nune’e akumulativu hosi progresu to’o ona 10%.
Dunrante konstrusaun UNP ne’e, PNDS hasoru difikuldade hanesan fornesedór suplay materiál tarde, klima udan no mós fornesedór distribui materiál uitoan, ida-ne’e fó impaktu mós ba konstrusaun UNP hodi konstribui implementasaun tarde.
Maske ekipa PNDS identifika kompaña fornesedór fornese materiál konstrusaun tarde, maibé sira kontinua halo monitorizasaun nune’e servisu kontinua la’o atu labele paradu.
“Fornesedór materiál iha fatin balun laiha, entaun ami-nia ekipa Fatumea kontinua halo reanunsia ba postu seluk inklui hosi munisípiu sira bele fornese materiál konstrusaun,” nia hateten.
Ekipa PNDS konstrui UNP 278 implementa iha postu administrativu hitu (7) iha suku 30, ho nia orsamentu hamutuk $4,735,452.
Jornalista : Celestina Teles
Editór : Cancio Ximenes
