DILI,06 fevereiru 2023 (TATOLI) – Saudozu Sebastião Gomes nia aman Afonso Gomes ho idade 75 baixa iha sala Verry Important Person (VIP) iha Hospitál Nasionál Guido valadares (HNGV) tanba sofre moras pulmaun.
“Sabadu semana kotuk, HNGV simu pasiente Afonso Gomes ho idade 75 ne’ebé transfere husi ospitál internamentu Viqueque mai HNGV iha departamentu emerjénsia ho kondisaun iis boot ka moras pulmaun”, Xefe Departamentu Emerjénsia HNGV Eldegar Martins, dehan iha nia kna’ar fatin HNGV, ohin.
Xefe emerjénsia ne’e rekorda, antes ne’e pasiente rasik halo ona tratamentu iha HNGV ho moras pulmaun ka tuberkoloze.
“Médiku sira hasai raiu-x ho rezultadu hatudu katak pasiente nia pulmaun ladún di’ak, tanba ita bo’ot sira hatene pasiente antes ne’e iha ona istória tuberkoloze”, nia informa.
Nia esplika, pasiente daudaun ne’e simu ona atendimentu husi espesialista pulmonolojia iha sala VIP HNGV.
“Ho idade ne’ebé avansadu, pasiente nia kondisaun mós ladún estável, maibé espesilista pulmonolojia sei halo hela atendimentu, ita espera katak di’ak lalais bele fila ba uma”, nia revela.
Iha fatin hanesan, Diretór Klíniku HNGV, Marcelino Correia, informa pasiente Afonso Gomes halo hela tratamentu iha sala VIP HNGV.
“Kona-ba transferénsia ba rai-liur, ida ne’e depende ba médiku sira ne’ebé mak halo tratamentu ba nia, maibé agora daudaun espesialista pulmonolojista sei halo hela atendimentu”, Marcelino Konklui.
Jornalista : Felicidade Ximenes
Editór : Zezito Silva
