COVALIMA, 07 fevereiru 2023 (TATOLI)–Benefisíariu Cesta Bázika iha aldeia Haemanu, suku Beco, postu Administrativu Suai, munisípiu Covalima, deskontente no sente triste ho kompañia Grariato Unipesoál, Lda, distribui produtu Cesta Bázika fuhuk no presu la tuir orsamentu ne’ebé parlamentu nasionál aprova.
“Kompañia lori fali buat aat ida mai fahe ba povu no povu mós la uza tan, tanba fore-munggu metan no fuhuk aat loos, foos mós fuhuk hotu, Ami la kontente, dehan ema-ida simu $50 mak na’an la to’o kilo ida-ne’e,” Maria Seleste Mesquita hateten ba jornalista sira, iha aldeia Haemanu, tersa ne’e.
Razaun, nia dehan, tanba tanba kompañia distribui fore-munggu no batar ne’ebé nia simu ne’e ho kondisaun fuhuk ka aat hotu entaun labele konsumu.
Benefisíaria seluk, Armindo Maia mós deskontente ho kompañia distribui produtu Cesta Bázika tanba presu la tuir orsamentu ne’ebé mak aprova hosi parlamentu Nasionál kada ema ida $50 maibé realidade la to’o $50.
“Iha momentu ne’ebá parlamentu aprova osan $50, maibé ami haree ho matan agora ami simu, balun simu sabaun rua, depois na’an la to’o kilo ida, buat ne’ebé ami iha mós sira fó, hanesan batar,” nia dehan.
Razaun tanba kompañia distribui Cesta Bázika presu la tuir orsamentu ne’ebé aprova iha Parlamentu Nasionál hanesan kada ema ida $50.00.
Benefisíariu deskontente simu produtu Cesta Bázika hosi komapañia fornesedór, tanba sasán ne’ebé sira simu hanesan na’an la to’o kilo ida, sabaun haris rua no Governu liuhosi kompañia fornesedór fó mós batar ne’ebé sira iha nanis ona.
Diretór kompañia Glariato Unipesoál, Lda, Laku Ximenes esplika, kompañia Distribui bazea item hamutuk 13 kon-aba ba lamentasaun hosi komunidade ne’e, nia parte konsidera ne’e normál no sempre akontese iha fatin-fatin ne’ebé sira distribui Cesta Bázika.
Kompañia Fornesedór Glariato Unipesoál, Lda, fornese Cezta Bázika ba Komunidade iha suku Beko, aldeia Haemanu ho item 13 mak henesan foos, sabaun, kafé, masin-midar, deterjent, fore-munggu, na’an, batar, ikan-maran, manu tolun no mina tein.
“Ha’u hanoin ne’e normál, ami ba fatin-fatin ne’e sira sempre ko’alia. Ne’e la’ós buat foun mak ami hasoru, ne’ebe baibain ami sempre hasoru hanesan ne’e. Primeru ne’e sira protesta tiha maibé depois ne’e sira mós entuziasmu hodi simu sasán sira-ne’e,” nia dehan.
Kompaña Glariato Unipesoál, Lda, distribui Cesta Bázika bainhira tuir konkorsu públiku hodi aprezenta item 13, nune’e baku ba osan bazea ba Planta no Kadernu Enkargu (BoQ) mak Governu fó sai kada ema $49.50.
Tuir dadus, benefisíariu iha suku Beco, aldeia Haemanu, postu administrativu Suai, munisípiu Covalima hamutuk 570 ho uma kain 116.
Antes ne’e, Ministru Administrasaun Estatal (MAE), Miguel Pereira de Carvalho, fó sai dadus benfisiáriu 1,5 mak benefisia ba programa Cesta Bázika iha Timor-Leste.
Enkuantu, iha loron 10 fulan-dezembru 2021 ne’e, Parlamentu Nasionál liuhosi diskusaun orsamentu jerál Estadu tinan 2022, iha faze espesialidade aprova tan orsamentu adisionál ho montante milliaun $40 ba Ministériu Komérsiu Turizmu no Indíútria (MTKI) hodi implementa programa Cesta Bázika.
Implementasaun programa Cesta Bázika ho nia objetivu estimula rekuperasaun ekónomia no atrai produsaun rai-laran, tanba natar barak abandona nune’e gradualmente osan labele sai ba li’ur no korre dependénsia produtu hosi rai-li’ur.
Jornalista : Celestina Teles
Editór : Cancio Ximenes
