CNE Covalima hein orientasaun atu hala’o edukasaun sívika
COVALIMA, 07 fevreiru 2023 (TATOLI)–Diretór Komisaun Nasionál Eleisaun (CNE, sigla portugés) Covalima, Hermenegildo de Sena, hateten CNE Covalima hein orientasaun hosi nasionál atu hala’o edukasaun sívika ba sidadaun sira iha postu administrativu.
“Ami sei hein orientasaun hosi nasionál, bainhira simu orientasaun hosi nasionál ami sei halo edukasaun sivika ba sidadaun hela iha área rurál, estudante, prezu iha prizaun Suai no grupu arte marsiál sira,” Diretór CNE Covalima ne’e informa ba Agência Tatoli, iha Kampung Baru, tersa ne’e.
Bazea ba planu hosi nasionál ne’ebé transmite mai CNE Covalima sei realiza workshop iha nasionál halo preparasaun ba programa edukasaun sivíka, ne’ebé ho nia frekuentemente 15 vezes sei hala’o ho fazeadamente.
“Ita-hala’o edukasaun sívika 15 vezes dentru fulan ida-rua, entaun ita laiha ona espasu atu halo preparasaun ba eleisaun parlamentar. Ita halo edukasaun sívika ba grupu komunidade hela iha área rurál, ba estudante sira, iha prizaun suai no grupu arte marsiál sira,” nia hateten.
Planu atu halo edukasaun sívika ba grupu arte marsiál sira iha postu administrativu sira-nia koordena ona ho komisáriu destakadu aprova ona planu, tinan ne’e atu halo edukasaun sivika ba grupu arte marsiál iha postu administrativu sira.
Tinan ne’e, CNE alarga tan halo edukasaun sivika ba iha postu administrativu sira tanba iha tinan kotuk CNE konsentra halo edukasaun sivika iha de’it munisípiu.
“Ha’u koordena ona ho komisariu destakadu aprova realiza iha postu labele hanesan iha tinan kotuk ita realiza edukasaun sivíka konsentra iha munisípiu, maibe tinan ne’e ita loke espasu katak sei hala’o mós iha postu administrativu sira.,” nia dehan.
Bainhira loos mak atu hala’o sei hein orientasaun hosi nasionál, tanba agora sira hosi nasionál konvida pesoál CNE kada munisípiu tuir workshop kona-ba atividade edukasaun sivika iha nasionál.
Preparasaun CNE ba eleisaun parlamentar ne’e CNE halo rekrutamentu ba ofisiál CNE atu superviziona eleisaun parlamentar tinan 2023, atu destaka ba iha sentru votasaun 100 no estasaun votusaun 120, entaun CNE la’ós koloka deit iha sentru votasaun maibé sei koloka mós ba estasaun votasaun sira-ne’ebé estabelese iha Covalima.
Jornalista : Celestina Teles
Editór : Cancio Ximenes
