DILI, 07 fevereiru 2023 (TATOLI) – Prezidente Repúblika, José Ramos Horta, dezafia lider komunitária liuliu Xefe Suku no Xefe Aldeia sira atu buka solusaun ba problema joven sira iha bairru, nune’e bele prevene konflitu.
“Papél lider komunitáriu sira importante tebes atu ko’alia ho komunidade, tau-matan ba komunidade, rezolve problema ne’ebé akontese iha suku no bairru. Ita bo’ot sira tenke fó solusaun ba problema sira iha uma-laran, problema entre viziñu sira, problema joven sira, buka inisiativa ba joven sira atu ita bele prevene konflitu”, Xefe Estadu ne’e hato’o liuhosi nia intervesaun bainhira realiza Diagu ba Pás ho Lideransa Komunitária sira inklui Polísia Nasionál Timor- Leste no Autoridade Protesaun Sivil ne’ebé mak hala’o iha Palásiu Prezidensiál, tersa ne’e.
“Maibé Autoridade lokál mak ezekuta lei no orden, imi maka tenke haree badinas, matenek iha aldeia iha barru sira, maske Governu tau polísia maibé ita bo’ot sira mak kontrola komunidade”, Xefe Estadu ne’e hateten.
Nia dehan, polísia ne’e prevensaun ba krime maibé autoridade lokál mak tenke matenek hodi halo aproximasaun ho nia komunidade sira oinsa buka solusaun ba problema atu problema labele iha suku no bairru.
Iha biban ne’e, Horta mós preokupa, kazu violénsia doméstika tanba sai problema bo’ot iha Timor-Leste no iha mundu.
“Ita tenke hamate problema ida ne’e. Vítima violénsia doméstika maioria feto, ita nian tia no avo sira la’os ema seluk, oinsá mak ita atu hapara buat sira ne’e, Prezidénsia Repúblika servisu hamutuk ho imi autoridade lokál atu hapara problema sira ne’e”, Horta dehan.
Nia hateten, violénsia mosu iha komunidade kuandu komunidade ne’e laiha lideransa di’ak, kuandu lideransa di’ak tebes xefe suku no xefe aldeia bele evita violénsia iha bairru.
Iha fatin hanesan, Xefe Suku Fatuhada, Marcelino Soares, hateten hanesan autoridade sempre iha obrigasaun hodi aproxima ba komunidade sira iha suku.
“Ami hanesan autoridade lokál, ami kontinua aproxima ami-nia komunidade hotu iha suku atu bele prevene krime, tanba krime ne’e estraga ita-nia aan no ita-nia futuru”, nia konklui.
Jornalista: Natalino Costa
Editór : Zezito Silva
