BAUCAU, 07 janeiru 2023 (TATOLI) – Komunidade suku Samalari, postu administrativu Laga seidauk asesu fasilidade hanesan postu saúde hodi halo tratamentu bainhira kondisaun moras.
Administradór postu administrativu Laga, Domingos Loiola José Pereira, esplika, postu Laga hamutuk suku neen mak establese ona postu saúde. Enkuantu suku rua seluk seidauk hanesan Teknomata asesu ne’ebé direita ba sentru saúde Laga no Samalari tenke asesu ba postu saúde iha suku Nunira.
“Maske dook maibé pasiénsia ba, ne’e difikulta tebes ita-nia komunidade,” Administradór postu administrativu Laga hateten iha Vila Nova, tersa ne’e.
Bainhira komunidade iha suku refere hetan moras grave tenke hulan tanba kondisaun infraestrutura hanesan estrada ne’ebé labele asesu ho transporte hosi suku ba sentru no postu saúde ne’ebé besik.
“Ha’u-nia hakarak tenke iha postu saúde ida, nune’e komunidade la’o besik, tanba durante ne’e pasiente sira moras tenke la’o de’it, liuliu laiha asesu ba karreta, sé moras grave hulan de’it,” Domingos Perreira akresenta.
Autoridade postu ne’e husu ba Ministériu Saúde (MS) atu tau ba konsiderasun liuliu probelema ne’ebé komunidade suku Samalari hasoru nune’ee bele asesu postu saúde.
Postu administrativu Laga hamutuk suku ualu kompostu Atelari, Sagadate, Saelari, Samalari, Libagua, Nunira, Soba no Tekinomata ho totál populasaun hamutuk 2022-resin.
Suku Samalari hamutuk aldeia hitu kompostu hosi Desagua, Lalu Uai, Sae Uata Issi, Samalari, Lualari, Sorugua no Uaera-mata ho totál populasaun hamutuk 2.677.
Jornalista : Natalino Belo
Editór : Evaristo Soares Martins
