Konstrusaun eskola EBF Uaibobo “paradu” tanba hein pagamentu faze datoluk
VIQUEQUE, 07 fevereiru 2023 (TATOLI)— Diretór Servisu Edukasaun Munisípiu Viqueque, Duarte Brandão, informa konstrusaun projetu komunitáriu Ensinu Báziku Filiál (EBF) Uaibobo, suku Uaibobo, postu Ossu, munisípiu Viqueque paradu tanba Ministériu Edukasaun, Juventude no Desportu (MEJD), seidauk halo pagamentu faze datoluk ho 75% ba grupu traballu sira.
“Foin lalais ne’e, badaen sira ba konstrusaun eskola EBF Uaibobo labele kontinua serbisu tanba orsamentu tarde no mosu dezentendimentu entre membru grupu serbisu tanba pagamentu ba faze datoluk seidauk hala’o. Tan ne’e maka sai difikulta ba sira, maibé ha’u informa ona ba finansa hosi MEJD katak semana oin sira hahú halo pagamentu ba faze datoluk ho 75%”, Diretór Duarte Brandão, hateten ba Agência Tatoli, iha postu Viqueque-villa, tersa ne’e.
Tuir planu, semana oin, ministériu Edukasaun Juventude no Desportu (MEJD), semana hahú halo pagamentu ba grupu responsavél ba reabilitasaun no konstrusaun infraestrutura eskola projetu komunitáriu Ensinu Baziku Filiál (EBF) Uaibobo nia.
“Konstrusaun paradu, tanba pagamentu faze datoluk nian maka selu tarde. Ho nune’e semana oin ha’u sei ba haree kontrusaun projetu komunitáriu sira ne’e hotu inklui EBF Uaibobo hodi informa ba MEJD atu bele halo pagamentu hodi kontinua projetu ne’e”, nia afirma.
Tuir nia kona-ba pagamentu ba konstrusaun projetu komunitáriu faze dahaat mak hanesan faze dahuluk pagamentu ba 25%, pagamentu daruak nain 50%, faze datoluk 75% no faze ikus mak pagamentu 100% nian.
Enkuantua konstrusaun EBF Uaibono pagamentu agora tama ba faze datoluk 75% nian. Aloka ba konstrusaun Eskola EBF Uaibobo iha sala tolu ho orsamentu $116.976,18.
Aleinde pagamentu faze datoluk, Responsavél ne’e dehan daudaun kondisaun estrada bá Uaibobo grave tanba udan, nune’e difikulta transportasaun material konstrusaun.
Alokasaun orsamentu ba programa projetu komunitáriu iha Viqueque hamutuk $1.781.991,95, kompostu hosi postu administrativu Viqueque-villa ba Ensinu Sekundáriu Calixa iha sala tolu ho orsamentu $113.359,56, EBF Ular Rihik iha sala tolu ho orsamentu $70.533,26, Eskola Pre-Eskolár Maria Lobato iha sala rua ho orsamentu $99.495,02, EBC Cabira-oan iha sala haat ho orsamentu $52.836,14 no Eskola Pre-Eskolár Sebastião Gomes iha sala rua. Enkuantu iha suku Uaimori seidauk implementa projetu ho |orsamentu $89.396,09.
Postu admistrativu Ossu ba Eskola Pre-Eskolár Uaibua iha sala tolu ho orsamentu $86.739,52, ESJ Olocasa iha sala tolu ho orsamentu $112.885,23, postu Ossu iha eskola rua seidauk implementa projetu hanesan Eskola EBF Uaibobo iha sala tolu ho orsamentu $116.976,18 no Eskola EBF Liaruca iha sala tolu ho orsamentu $112.599
Postu administrativu Uatulari ba Eskola EBF Nahae iha sala tolu ho orsamentu hamutuk $114.134,85, EBC Uatulari ba sala tolu ho orsamentu $70.191,21, EBF Ualeque iha sala tolu ho orsamentu S$106.475,42, Eskola Sekundáriu Tékniku Vokasionál (ESTV) Kaloheda ho orsamentu $159.590,65, EBF Debuisi iha sala tolu ho orsamentu $98.990,27, EBF Uaibira iha sala tolu ho orsamentu $103.111,97 no EBF Edimumo iha sala tolu ho orsamentu $98.958,49.
Iha postu administrativu Uatucarbau, mak projetu konstrusaun Eskola ESJ Uatucarbau iha sala haat ho orsamentu $90.595,35 no EBC Uatucarbau iha sala haat ho orsamentu $85.016,63.
Jornalista : Vitorino Lopes da Costa
Editór : Florencio Miranda Ximenes
