COVALIMA, 07 fevreiru 2023 (TATOLI)–Diretór PNDS Filipe Cardoso, informa progresu konstrusaun Uma Naroman ba Povu Plus A (UPN+ A) ne’ebé implementa iha postu administrativu Maucatar, munisípiu Covalima, kumulativu atinje ona 3.9%.
“Progresu implementasaun konstrusaun UNP+ A unidade 75 ne’ebé implementa iha postu administrativu Maucatar iha suku haat ne’e, agora daudaun ita implementadu progresu atinje 3.9%,” Filipe Cardoso relata progresu ne’e ba Agência Tatoli, -nia kna’ar fatin, Sukaer Laran, segunda ne’e.
Konsrusaun foin atije 3.9%, nia dehan, tanba ho razaun iha faze implementasaun ne’e balun foin fui aliserse, balun foin simu materiál konstrusaun husi kompañia fornesedór, balun foin mak hahú halo konstrusaun.
Mask, progresu implementasaun foin atinje 3.9% maibé PNDS iha esperansa katak molok trimestre dahuluk konklui, iha ona mudansa hodi aumenta nia progresu persentajen.
“Ami iha esperansa, janeiru molok trimestre dahuluk ramata ne’e, progresu sei aumenta nia persentajen. Ita hatene autór ba implementasaun ne’e ba konstrusaun UNP+ A ne’e, diretamente komunidade mak sai autór implementadór,” hateten.
Durante implementa projetu 578 iha munisípiu Covalima ne’e hasoru difikuldade oioin maibé PNDS kontinua esforsu nafatin.
Iha tinan 2022, PNDS implementa projetu 578 iha munisípiu Covalima ita mós hasoru obstakulu oioin hanesan fornsedór balun fornese materiál tarde tuir tempu ekipa sira husu, traballadór ema lokál kada suku bainhira tempu udan sira okupadu sira-nia toos ho natar sai difikuldade atu aselera prosesu.
Alende mós materiál defini iha Planta no Kadernu Enkargu (BoQ) iha munisípiu laiha, tenke sosa iha Dili hodi prenxe espesífikasaun ne’ebé difine iha BoQ, entan PNDS koordena ho enjiñeiru iha nasionál atu fó rekomendasaun bazea ba espesifikasaun materiál iha munisípiu pelu menus bele konsidera.
Implementasaun UNP+ A ho unidade 75 ne’e konstrui iha postu administrativu Maucatar ne’ebé implementa iha suku Holpilat, Belecasak, Matai no Ogues ho nia orsamentu hamutuk $965.000.
Jornalista : Celestina Teles
Editór : Cancio Ximenes
