BAUCAU, 07 janeiru 2023 (TATOLI) – Ministériu Obra Públika (MOP) sei reabilita estrada rurál hamutuk pakote 11 iha munisípiu Baucau iha tinan ne’e.
Diretór Servisu Munisipál Obra Públika Baucau, Pedro Alexandre Guterres Perreira, esplika, estrada rurál hirak-ne’e parte diresaun nasionál no ponte cheia aprvoa ona no submete ona Ajénsia Dezenvolvimentu Nasionál (ADN) hodi halo verifikasaun dadus.
“ADN halo ona verifikasaun no haruka hadi’a fali dadus hosi pakote Samalari ba Velavista no aban ita sei submete fali ba nasionál,” Diretór Servisu Munisipál Obra Públika Baucau hateten iha Vila Nova, tersa ne’e.
Estrada pakote 11 refere lokaliza iha área suku Samalari diresaun ba Buibau no Velavista, postu Baucau vila purvolta kilómetru 10.5 ne’ebé fahe ba pakote neen komposta hosi kada pakote kilómetru rua.
Postu Laga, suku Sagadati, diresaun Aebuti ba Serebu hamutuk kilómetru 8.5 ne’ebé fahe ba pakote haat no Sagadati ba Beluwali pakote ida no hamutuk kilómetru 4.6.
Tótal orsamentu estimasaun ba estrada pakote hirak-ne’e hamutuk millaun $5-resin ($5,776.368.40 ne’ebé tipu reabilitasaun ho kategoria klase D hosi postu ba suku.
“Komunidade sempre lamenta no levanta beibeik tanba ne’e hosi nasionál konsidera no aprova hodi reabilita iha tinan-2023,” Pedro Perreira akresenta.
Bainhira verifikasaun hosi ADN finaliza sei submete fali ba MOP hodi kontinua ba prosesu aprovizonamentu ne’ebé tuir previzaun presiza durasaun fulan-tolu nune’e estrada refere sei implementa iha fulan-maiu.
Tuir dadus hosi Obra Públika Munisípiu Baucau estrada rurál hamutuk kilómetru 400-resin no hela pursentu 50 mak seidauk reabilita ne’ebé lokaliza iha postu admistrativu neen iha munisípiu Baucau.
Jornalista : Natalino Belo
Editór : Evaristo Soares Martins
