Reabilitasaun sede suku haat iha Fohorem sei iha aprovizionamentu
COVALIMA, 07 fevereiru 2023 (TATOLI)–Diretór Programa Nasionál Dezenvolvimentu Suku (PNDS), Filipe Cardoso, hateten progresu reabilitasaun sede suku haat (4) iha postu administrativu Fohorem, munisípiu Covalima sei iha prosesu aprovizionamentu.
“Ita tama iha reabilitasaun sede suku faze datoluk atu kompleta iha suku-30 ne’ebé agora sede 12 mak iha faze ikus liu tama iha reabilitasaun. Oras ne’e daudaun reabilitasaun sede suku iha suku ualu (8) impelementadu atinje ona 10-11%. Maibé reabilitasaun sede suku haat (4) iha Fohorem foin tama iha prosesu aprovizionamentu,” Filipe Cardoso hateten ba Agência Tatoli iha nia kna’ar fatin, Sukaer Laran, segunda ne’e.
PNDS reabilita sede suku 12 ne’e iha postu administrativu Tilomar reabilita sede suku haat (4), Maucatar reabilita sede suku haat (4) no iha postu administrativu Fohorem sede suku haat (4).
Hafoin finaliza reabilitasaun sede suku 12 iha postu administrativu tolu, entaun sede suku 30 iha Covalima finanaliza ona reabilitasaun.
Tanba, nia dehan, iha faze dahuluk PNDS reabilita sede suku 10, faze daruak reabilita sede suku ualu (8) no ba faze datoluk reabilita sede suku 12.
Orsamentu reabilitasaun sede suku ne’ebé implementa iha postu administrativu Maucatar, Fohorem no Tilomar hamutuk $144,000.00 no hosi orsamentu ne’e kada sede suku $12,000.00.
Iha 09 fulan-dezembru tinan 2021 ne’e, Parlamentu Nasionál (PN) aprova Orsamentu Jerál Estadu tinan 2022 ba Ministériu Administrasaun Estatal (MAE) ho montante $33,723,731.
Jornalista : Celestina Teles
Editór : Cancio Ximenes
