DILI, 07 fevereiru 2023 (TATOLI) – Prezidente Repúblika José Ramos Horta, hateten semana oin sei dekreta loron eleisaun lejislativa.
“Eleisaun atu mai daudaun ona, segunda feira ha’u sei marka data eleisaun. Ha’u koalia tiha ona ho partidu sira hotu, maibé horsida ha’u sei rona partidu sira seluk tán hanesan PST depois ASDT, maske sira laiha parlarmentu laran, maibé sira matenek, ha’u hakarak rona sira depois maka deside momentu loron eleisaun”, Prezidente Repúblika José Ramos Horta, dehan iha Palásiu Prezidensiál, tersa ne’e.
Nia dehan, públiku halo ona interpretasaun jurídiku liuliu advogadu kona-ba loron eleisaun tenke to’o 14 setembru.
“Klaru tuir ha’u-nia interpretasaun ba konstituisaun, buat hotuhotu ne’ebé mai data eleisaun ne’e iha laiha kontroversiál, nunka iha kontorversiál, iha Estadu Unidus Amerika, Prezidente nia mandatu hotu iha 3 novembru ne’e, kompleta ona mandatu tinan haat labele muda” nia katak.
Horta hateten, iha eleisaun ne’e Prezidente Repúblika maka halo desizaun, tanba iha konstitusaun ne’e kada Parlamentu no Governu nia mandatu tinan-lima
“Iha Timor-Leste, ita muda ona eleisaun dala hira ona, última eleisaun iha 12 maiu 2018. Depois 28 maiu Tribunál Rekursu konfirma rezultadu. 13 junu 2018 parlamentu hili Prezidente Parlamentu no hili estrutura meja. Signifika hahú kedan 13 juñu no sira hahú sira-nia servisu, iha semana ida ka semana rua ita iha ona Governu foun”, Horta esplika.
Tuir nia, Governu tenke mai hosi parlamentu foun. Portantu Governu foun ne’e tenke prepara programa Governu, tenke prepara orsamentu.
“13 setembru ne’e sesaun hanesan formál, ne’e sesaun solene ne’ebé atu loke lejislatura foun, Sé lejislatura ne’e remata iha 14 setembru, entaun parlamentu ida ne’e nia mandatu la’os tinan lima maibé tinan lima liu ona”, Horta konklui.
Jornalista:Natalino Costa
Editór : Zezito Silva
