COVALIMA, 08 fevereiru 2023 (TATOLI)–Diretór Servisu Edukasaun Covalima, Rui Amarál Suri Seran, hateten iha tinan 2023 ne’e Servisu Edukasaun Munisípiu Covalima sei hetan projetu komunitáriu ualu (8) ba konstrusaun infraestrutura eskola hosi Ministériu Edukasaun Juventude no Desportu (MEJD).
“Iha tinan 2023 ita iha munisípiu Covalima hetan projetu komunitáriu ualu (8) husi Ministériu Edukasaun Juventude no Desportu (MEJD), ne’ebé forma ona ekipa no sira-nia naran enkamiña ona dirasaun infraestrutura,” Diretór Servisu Edukasaun Covalima ne’e hateten ba Agência Tatoli, iha nia kna’ar fatin, Santa Rosa, kuarta ne’e.
Hafoin haruka sira-nia naran, nia dehan, hein de’it ona atu halo analiza hodi fó formasaun no haree mós orsamentu atu implementa tanba aprovadu ona.
Prosesu implementasaun Projetu Komunitária konstrui eskola ualu (8) ne’e, infraestrutura mai husi grupu komunitária ka komunidade.
Konstusaun eskola ualu (8) iha Covalima ne’e mak hanesan Eskola Bázika Filiál (EBF) Tobur, Eskola Bázika Sentrál (EBC) Foho-Bua, Eskola Bázika Filiál (EBF) 1, 2 Tilomar, eskola pre-eskolár Belulik Kraik, eskola pre-eskolár Suai-Loro, eskola pre-eskolár Tali-oan, eskola pre-eskolár Audian Camanasa no eskola pre-eskolár Ogues.
Jornalista : Celestina Teles
Editór : Cancio Ximenes
