ASDT-PST husu PR dekreta loron eleisaun parlamentár tuir konstituisaun
DILI, 08 fevereiru 2023 (TATOLI)—Prezidente Repúblika (PR), José Ramos Horta, kuarta ne’e, konvida no rona partidu laiha asentu Parlamentár hanesan Assosiasaun Sosiál Demokrátika Timorense (ASDT) ho Partidu Sosialista Timor (PST) molok dekreta loron eleisaun Parlamentár 2023.
Notísia Relevante: PR sei konsulta ho partidu polítiku laiha asentu Parlamentár
“Ohin, Prezidente Repúblika konvida ASDT atu husu mós ASDT nia hanoin ba eleisaun parlamentár hanesan sasukat ida atu Xefe Estadu dekreta loron ba eleisaun nian. ASDT buka apoiu tomak ba Xefe Estadu deside tuir kompeténsia no lei ka konstituisaun ne’ebé iha, atu prosesu demokrátiku ne’e bele nakonu ho pás no estabilidade,” Sekretáriu Jerál ASDT, Vicente dos Santos, hateten ba jornalista sira hafoin ramata enkontru ho Prezidente Repúblika iha Palásiu Prezidensiál Nicolau Lobato, Bairru Pite.
Nia dehan, ASDT nu’udar partidu istóriku rejistu iha tinan 1974, hafoin restaura indepedénsia iha 2002 no iha 2018 tenke hasoru konsekuénsia labele partisipa eleisaun tanba Tribunál Rekursu (TR) deside labele tuir tanba iha problema internál presiza rezolve.
Sekretáriu Jerál Partidu ne’e seida’uk fó sai detallu sira atu ba rejistu fali maibé sira-nia prepara an hela.
“Tuir lei, ASDT legál hela maibé tanba Tribunál deside perde estatutu tenke ba reativa fila-fali,” nia dehan.
Iha fatin hanesan, Prezidente PST, Avelino Coelho, hateten haktuir ba regularidade konstituisionál, haree ba kalendáriu eleitorál ne’ebé hahú iha 2018 mak loron to’o duni ona hakarak ka lakohi ne’e kompeténsia Xefe Estadu nian atu marka loron eleisaun parlamentár.
“Ami-nia hanoin di’ak liu marka iha fulan-fevereiru nia laran, maibé depende ba Xefe Estadu nian. Depois eleisaun ne’e realiza iha fulan-maiu no juñu nia klaran ne’e iha ona parlamentu foun, no fulan juñu nian laran iha ona Governu foun, depois dezenvolvimentu bele la’o,” nia hateten.
PST mós sei kompete eleisaun parlamentár ne’e, nune’e hein desizaun saida de’it hosi PR prontu atu partisipa.
“PST preparadu tanba lei partidu polítiku hateten, se la tuir eleisaun liu ona tinan lima partidu ne’e mate, rejistu foun presiza rihun-20. Ne’ebé, PST preparadu liu fali eleisaun ne’ebé liu tiha ona, eleisaun parlamentár mai agora preparadu aprezenta kandidatura,” nia dehan.
Jornalista : Nelson de Sousa
Editór : Cancio Ximenes
