iklan

MUNISÍPIU, VIQUEQUE

Empreza hein sertifikasaun hosi MOP hodi fui alkatraun ba estrada Uatulari

Empreza hein sertifikasaun hosi MOP hodi fui alkatraun ba estrada Uatulari

Kondisaun estrada iha postu Uatulari, munisípiu Viqueque.Imajen/ Vitorino Lopes da Costa

VIQUEQUE, 08 fevereiru 2023 (TATOLI)— Diretór Serbisu Obra Públika (MOP), Munisípiu Viqueque, Marito do Rego, informa daudaun ne’e empreza Hela Mula unip, Lda no Greo Unip, Lda hein sertifikasaun hosi Diresaun Nasionál Laboratóriu hosi Ministériu Obra Públika (MOP) hodi fui alkatraun ba estrada iha postu Uatulari, munisípiu Viqueque.

“Empreza responsavél hahú instala ona ekipamentu iha mota Bebui, postu Uatulari hodi bele dulas fatuk no tein alkatraun. Maibé laboratóriu nasionál husi MOP presiza sertifika lai ba marteriál alkatraun sira hafoin empreza bele fui alkaraun, se seidauk atribui ita tenke hein”, hateten Marito do Rego, ba Agência Tatoli, iha ninia kna’ar fatin Beloi, kuarta ne’e.

Atu garante kualidade alkatraun, nia dehan laboratóriu nasionál mak iha kompeténsia atu sertifika ba materiál alkatraun, kahur alkatraun liuliu temperatura halo alkatraun no seluk tan.

“Ida-ne’e regra maka hanesan ne’e ita tenke halo tuir, maibé ba Estrada Uatulari iha kilomentru 10 la to’o loron tolu ne’e bele hotu. Nune’e mós empreza ninia tékniku espesialista ba alkatraun nian mós dadaun iha estranjeru hela”, nia afirma.

Antes ne’e, ekipa MOP halo ona teste hodi hatene serbisu empreza responsavél nia serbisu, progresu fiziku atinje ona 58,39%.

Estrada nasionál iha postu Uatulari ho naruk kilómetru 10 ho kustu millaun $8, asina kontratu iha tinan 2017, ne’ebé empreza Hela Mula unip, Lda mak toma-konta kilómetru 5 no Greo unip, Lda responsabiliza kilómetru 5.

Kona-ba projetu estrada nasionál trosu Baukau-Venilale no Venilale-Viqueque ne’ebé konstrui husi kompañia Internasionál CRIG-COVEC ho distánsia kilometru 58-resin, ho orsamentu millaun $44, hosi fundu impréstimu husi Banku Dezenvolvimentu Aziátiku (ADB).

“Estrada trosu Venilale mai Viqueque daudaun kompañia sira kontinua serbisu, iha área Viqueque ne’e aspál komesa tau iha Loihuno to’o ona iha Buanuara, maibé ninia progresu serbisu maka ha’u ladun hatene tanba relatóriu kompañia la aprezenta ba ami serbisu iha munisípiu, kompañia baibain lori relatóriu ba liu nasionál. Nune’e ninia progresu atinjimentu sira-ne’e parte nasionál maka hatene”. Nia hato’o.

Jornalista : Vitorino Lopes da Costa

Editór        : Florencio Miranda Ximenes

iklan
iklan

Leave a Reply

iklan
error: Content is protected !!