DILI, 08 fevereiru 2023 (TATOLI) – Governu halo alterasaun dahuluk ba Dekretu-Lei númeru 23/2009, loron 5 fulan-agostu, kona-ba rejime infrasaun administrativa kontra ekonomia no seguransa alimentár, ne’ebé aprezenta hosi Ministru Koordenadór Asuntu Ekonómiku, Joaquim Amaral.
“Hafoin liu-tiha tinan 12 vijénsia rejime infrasaun administrativa kontra ekonomia no seguransa alimentár verifika katak iha nesesidade atu prosede ninia revizaun no atualizasaun, tuir dinámika no evolusaun permanente ba realidade ekonomia no sosiál nasionál, maka hanesan atu prosede reforsu ba medida no mekanizmu sira hodi kombate ba infrasaun sira kontra ekonomia no seguransa alimentár”, Ministru Prezidénsia Konsellu Ministru informa iha Palásiu Governu.
Fidélis Magalhães esplika katak alterasaun lejizlativa ne’e ho objetivu atu haluan ámbitu aplikasaun rejime nian, inklui mós produtu la’ós alimentár sira, hodi simplifika rejime sansionatóriu, ba artikulasaun kona-na infrasaun sira hanesan kaman, todan no todan liután no ninia korespondésia ho tipolojia ajente ekonómiku ida.
No estabelesimentu prosedimentu elementár instrusaun, notifikasaun infrasaun no fakuldade hodi rona no defende infratór, definisaun konseitu sasan kontrafeita ka falsu no sasan pirateada ka bajakan, definisaun dispozisaun kona-ba ‘publisidade enganoza’, hodi hafalun situasaun ida ne’ebé loos husi disorsaun mensajem publisitária.
Jornalista: Antónia Gusmão
Editora: Maria Auxiliadora
