Governu aprova lei kona-ba seguransa, saúde no ijiene iha serbisu-fatin

DILI, 08 fevereiru 2023 (TATOLI) – Ministru Koordenadór Asuntu Ekonómiku, Joaquim Amaral, no Sekretáriu Estadu ba Formasaun Profisionál no Empregu, Alarico do Rosário, aprezenta proposta lei kona-ba seguransa, saúde no ijiene iha serbisu-fatin ne’ebé hetan ona aprovasaun hosi Governu.

Ministru Prezidénsia Konsellu Ministru, Fidélis Magalhães, hatete proposta lei ba Parlamentu Nasionál ne’e estabelese katak organizasaun reprezentativa empregadór no traballadór sira responsavel ba área sira kondisaun serbisu no saúde nian tenke promove asaun formasaun iha área protesaun no prevensaun seguransa, ijiene no saúde iha serbisu-fatin kontra risku no moras sira impaktu husi serbisu.

Aleinde ne’e, depende mós ba empregadór sira atu organiza fatin, meiu no prosesu serbisu hodi evita risku ba saúde no seguransa ba traballadór sira, garante ezisténsia sinalizasaun seguransa no saúde iha serbisu-fatin no ekipamentu protesaun, entre medida prevensaun sira seluk, nomós fó informasaun no formasaun ne’ebé adekuada ba traballadór sira.

“Objetivu husi atividade ijiene, seguransa no saúde nian iha serbisu-fatin maka garante kondisaun traballu iha kualkér empreza iha kondisaun fízika, mentál no sosiál ne’ebé di’ak, la’ós de’it livre husi moras no enfermidade tuir Organizasaun Saúde Mundiál”, nia konklui.

Jornalista: Antónia Gusmão

Editora: Maria Auxiliadora