MPO hahú identifika fatin lixu plástiku iha sentru leste
BAUCAU, 08 fevereiru 2023 (TATOLI) – Governu liuhosi Ministériu Planeamentu Ordenamentu hahú identifika fatin atu sai sentru investimentu lixu plástiku iha sentru leste.
Diretór Nasionál Planeamentu Espesiál hosi Ministériu Planeamentu Ordenamentu Territoriál, Kassius Klei Ximenes, esplika, projetu ne’e foin iha faze dahuluk estudu pre-estudu viabilidade no programa refere hala’o bainhira kooperasaun entre governu Timor-Leste ho banku investimentu uniaun europea ne’ebé responsável hosi kompañia kosultór hosi Dinamarka.
“Presiza haree asuntu tékniku nian, asuntu investimentu nian iha avaliasaun projetu ninia kustu bele apropriadu, governu atu investe ka buka parseiru inklui haree kondisaun sosiál no ambiente,” Diretór nasionál planeiamentu espesiál MOP hateten iha Vila Nova, kuarta ne’e.
Bainhira faze dahuluk hotu sei kontinua ba estudu viabilidade antes foti desizaun kona-ba investimentu lixu plástiku iha sentru leste hanesan Manatuto, Lautem, Viqueque no Baucau ne’ebé sei sentraliza iha fatin ida nune’e bele halo jestaun ba lixu plástiku ne’ebé prodús hosi komérsiu sira.
“Presiza jestaun ba lixu, fatin sanitáriu hotu tiha depois sei halo planu atu utiliza ba lixu plástiku hirak-ne’e,” Kassius Ximenes akresenta.
Tuir planu parte Ministéiru Planu Ordenamentu rasik tarjetu medida rai hamutuk ektare 10-resin hodi halo investimentu ba fatin lixu plástiku liuliu halo jestaun ba lixu plástiku tuir teknolojia avansadu.
Nune’e sei identifika fatin ne’ebé seguru hanesan lixu labele kontaminadu bee iha rai okos no dook hosi mota nune’e labele transporta hodi fó impaktu ba biodiversidade iha tasi.
Fatin ne’ebé identifika tuir planu sei estabelese iha Ensadolak área baliza entre postu Vemasse, munisípiu Baucau ho postu Laleia, munisípiu Manatuto ne’ebé konsideradu prense kritéria hodi halo investimentu lixu plástiku iha sentru leste iha futuru.
Jornalista : Natalino Belo
Editór : Evaristo Soares Martins
