MS investiga ona kazu inan-oan mate iha kareta ambulánsia  

DILI, 08 fevereiru 2023 (TATOLI) – Vise-Ministru Saúde Bonifacio Maucoli dos Reis, hateten Ministériu saúde (MS) halo ona investigasaun ba kazu inan ho oan mate iha kareta ambulánsia bainhira transfere hosi Ópsitál Referál Maliana mai Hospitál Nasionál Guido Valadares (HNGV).

“Kazu inan ho oan mate iha karreta ambulánsia, foin lalais, ne’ebé transfere hosi Ópsitál Referál Maliana mai Dili. Ita halo ona investigasaun, hafoin ita fó sai rezultadu iha tempu badak”, Bonifacio Maucoli dos Reis, informa ba jornalista sira iha Palásiu Governu, ohin.

Nia dehan, Servisu Nasionál Ambulánsia Emerjénsia no Médiku (SNAEM) durante ne’e, pesoál saúde, enfermeiru, mediku no ekipamentu balun hanesan oxijéniu mak iha kareta laran, maibé kazu bebé ho nia inan ne’ebé transfere husi Maliana mai Dili mate iha dalan ne’e, tanba inan kauza moras hepatitis B no bebé moris permatura signifika nia loron seidauk to’o atu moris.

Vise-MS dehan, inan ho bebé ne’e husi Postu Adminsitrativu Lolotoe, Munisípiu Bobonaro atu halo tratamentu iha ospitál Maliana tanba ne’e mak tranferes mai Dili, maibé la konsege salva nia vida tanba ho moras komplikasaun.

“Informasaun prelimináriu pasiente ne’e mai husi Lolotoe, sira mai konsulta no halo tratamentu iha Óspitál Referál Maliana tanba moras komplikdu hanesa hepatitis B”, nia dehan.

Nia konta katak pasiente ne’e trasnfere husi Maliana mai Dili, iha médiku mak akompañ, maibé to’o iha sentru saúde Atabae pasiente ne’e hahú tur ahi, bebé moris. entaun husi ne’e profisionál saúde halo atendimentu kedas no kontinua transfere inan ne’e mai HNGV, maibé to’o iha Munisípiu Liquiça bebé iis kotu. Husi ne’e inan kontinua transfere mai Dili to’o iha HNGV, inan mós mate tanba moras komplikasaun.

Tanba ne’e ba oin, MS tau nafatin providénsia ba asuntu sira hanesan ne’e liuliu ba profisionál saúde sira atu halo atendimentu di’ak ba pasiente sira.

Vise-Ministru Saúde, husu ba komunidade sira nafatin fó fiar ba profisionál saúde sira atu halo atendimentu iha fasilidade saúde ne’ebé de’it.

“Ami husu ba inan isin rua sira banhira grávida ona, nafatin mai konsulta regulár iha fasilidade saúde sira ne’ebé mak besik iha ita boot sira nia hela fatin, atu nune’e deteta sedu moras ruma ne’ebé iha komplikasaun no transfere sedu, labele hein to’o grave mak transfere, ida ne’e problema bo’ot ba ita”, nia konklui.

Jornalista : Felicidade Ximenes

Editór : Zezito Silva