iklan

EKONOMIA, HEADLINE, MUNISÍPIU, OÉ-CUSSE (RAEOA)

PA RAEOA husu kompañia Huno Bahalaco tenke finaliza projetu eskola iha Taiboko

PA RAEOA husu kompañia Huno Bahalaco tenke finaliza projetu eskola iha Taiboko

Projetu eskola ne'ebé kompañia Bahalaco Unipesoál Lda, abandona iha aldeia Ulas suku Taiboko [8/2 14.55] Tatoli RAEOA: Imajen Tatoli/ Abílio Elo Nini.

OÉ-CUSSE 08 fevereiru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, husu ba kompañia lokál Huno Bahalaco Unipesoál Lda atu finaliza projetu eskola ne’ebé abandona hela iha aldeia Ulas, suku Taiboko, sub-rejiaun Pante Makasar.

Arsénio Paixão Bano, informa, konstrusaun projetu ba eskola ne’e, lansa iha agostu 2022, tuir loloos kompañia tenke entrega ba Autoridade RAEOA iha dezembru to’o janeiru 2023 foin lalais ne’e, maibé daudaun ne’e, kompañia abandona.

Nune’e iha kuarta ne’e, nia parte hamutuk ho tékniku sira hosi Diresaun Rejionál Infraestrutura, no tékniku sira hosi Diresaun Edukasaun hamutuk ho Sekretária Rejionál ba Asuntu Edukasaun bo Solidariedade Sosiál, Avelina da Costa, observa direita projetu ne’e rasik molok atribui karta xamada ba kompañia.

“Ha’u triste tebes, ohin ha’u husu atu mai vizita eskola ida, ha’u hanoin tenke hotu iha dezembru 2022 maibé to’o agora seidauk hotu falta de’it 50%, kompañia iha semana ne’e tékniku sira sei aviza nia to’o semana oin tenke mai hato’o ajenda klaru atu halo hotu, karik iha semana oin laiha informasaun ajenda hosi kompañia kona-bá planu atu finaliza konstrusaun ne’e, entaun Autoridade sei termina kontratu hodi fó fali ba seluk atu konklui projetu eskola ne’e,” Arsénio Paixão Bano, informa ba jornalista sira iha aldeia Ulas, Oé-Cusse, kuarta ne’e.

Tuir Prezidente Autoridade katak, Autoridade harii eskola ne’e tanba atu fasilita estudante sira hodi asesu ba eskola ho distánsia besik, tanba iha Ulas fatin izoladu tebes iha suku Taiboko, labarik sira la’o-ain hodi hala’o estudu iha Eskola Bázika Filiál (EBF) Kiusisu lori tempu to’o oras tolu mak foin to’o.

“Ida-ne’e mós sa’e foho no hakat mota, entaun ita deside halo eskola ida iha fatin ne’e, populasaun no liurai fó sira-nia rai, sira fó tiha ona rai, ita halo mak abandona fali, entaun ohin ha’u mai to’o ne’e, agora tenke rezolve, tanba ne’e la’ós problema osan laiha, Autoridade selu ona 50%, entaun problema mak projetu ne’e tenke hotu no aprezenta razaun,” nia fó hanoin.

Xefe Suku Taiboko, Joaquim Tafin, konsidera kompañia laiha responsabilidade, tanba Autoridade apoia hodi harii eskola, maibé kompañia husik no abandona tiha.

“Konstrusaun ne’e importante tebes iha ha’u-nia suku liu-liu iha aldeia Ulas iha bairru rua, fatin ne’e izoladu tebes no dook hosi eskola, agora autoridade halo ona eskola iha-ne’e, ami nu’udar autoridade lokál, sente triste tanba kompañia laiha responsabilidade, maibé ho prezensa prezidente autoridade sei buka solusaun atu finaliza konstrusaun ne’e,” nia katak.

Purtantu liga ho asuntu ne’e, Agência Tatoli tenta atu konfirma ho tékniku hosi kompañia Huno Bahalaco Unpesoál, Lda, maibé rejeita fó informasaun maibé nia promete sei hato’o koñesimentu ba Diretór kompañia kona-bá fiskalizasaun Autoridade nian iha konstrusaun ne’e.

Entretantu, projetu ne’e ezekuta hosi kompañia Huno Bahalaco Unipesoál, Lda, ho númeru kontratu 58/2022/PA/RAEOA-ZEESM, ho valór kontratu hamutuk  $58,760.11, Autoridade RAEOA aloka hosi Orsamentu Jerál Estadu (OJE) 2022 nian ho durasaun servisu durante fulan haat, hahú agostu to’o dezembru 2022.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!