iklan

DILI, POLÍTIKA

Peace Run enkoraja ema hotu kria pás iha mundu

Peace Run enkoraja ema hotu kria pás iha mundu

Prezidente Repúblika, José Ramos Horta, partisipa iha abertura serimónia, SRI CHINMOY ONENESS-HOME PEACE RUN, iha Palásiu Prezidensiál Nicolau Lobato, Bairru-Pité, kuarta (08/02). Imajen Tatoli /Egas Cristovão

DILI, 08 fevereiru 2023 (TATOLI)—Grupu Sentru Sri Chinmoy, kuarta ne’e, realiza Peace Run ka halai ba dame óinsa atu bele enkoraja ema hotu kria ho pás no domin nakonu iha mundu.

Diretór Ezekutivu Peace Run, Salil Wilson, hateten sira-nia parte hamutuk ho Prezidénsia Repúblika realiza Peace Run ka halai ba dame ne’ebé partisipa hosi funsionáriu Prezidénsia repúblika no estudante sira.

Programa “Halai ba Dame” ne’e Grupu Sentru Sri Chinmoy hahú hala’o iha tinan 1987 no to’o ohin loron kontinua hala’o nafatin.

Prezidente Repúblika, José Ramos Horta, partisipa iha Opening Ceremony, SRI CHINMOY ONENESS-HOME PEACE RUN. iha Palásiu Prezidensiál Nicolau Lobato, Bairru-Pité, kuarta (08/02). Imajen Tatoli /Egas Cristovão

“Ida-ne’e atu selebra faktu ida ita halai dame nian ne’e atu ita iha responsabilidade morál nian atu bele kria mundu ne’e nakonu pás no domin,” nia hateten iha intervensaun bainhira hala’o Peace Run iha areadór Prezidénsia Repúblika Nicolau Lobato, Bairru Pite, kuarta ne’e.

Nia haktuir, programa Halai ba Dame ne’e realiza no haleu ona nasaun 160-resin iha mundu hodi hasoru ema lubun ne’ebé fó inspirasaun, liu-liu lidér sira iha mundu ne’ebé kontinua luta ba pás iha mundu.

Antes hahú hala’o atividade “Halai ba Dame” ne’e ekipa hosi Peace Run ne’ebé kompostu hosi nasaun oioin iha mundu realiza uluk game ida ba estudante sira-ne’ebé animadu tebes.

Ekipa Peace Run mós entrega hodi tara medalla ida ba Prezidente Repúblika (PR), José Ramos Horta, hodi rekoñese ba Horta ninia asaun ka serbisu sira durante ne’e kria pás iha rai-laran no mundu, nune’e priviléjiu boot atu simu onra medalla refere reprezenta nasaun Timor-Leste.

Hafoin ne’e estudante no funsionáriu prezidénsia repúblika nian taka liman pas iha fuan ho durasaun segundu 30 nia laran 30 ne’ebé ho signifika sentidu pás no domin ne’e hahú hosi ema ida-idak nia fuan.

“Antes ita hahu ita-nia marsa ida-ne’e, ema ruma bele hateten mai ha’u katak bainhira ita sente domin ka pás ne’e hahú hosi ne’ebé, hahú hosi ita-nia fuan. Entaun, ita-nia liman tau iha fuan durante segundu 30 nia laran, hakmatek sente saida mak iha ita-nia fuan, imajina ita bele dada iis, imajina ita bele dada iis ho domin,” nia dehan.

Iha marsa halai ba dame ne’ebé halo haleu areadór Prezidénsia Repúblika ne’e, estudante no funsionáriu sira temi pás ka dame tutuir dalan.

Prezidente Repúblika, José Ramos Horta, hateten ida-ne’e  movimentu ida ema iha mundu liu rihun ba rihun luta ba partisipa hanesan lidér espirituál relijiozu barak iha mundu mós halo movimentasaun sira.

Nia parte ko’alia dala ida iha tempu liu ba iha Nova Yorke, nune’e komesa koñese movimentu ka organizasaun ne’e sira-nia serbisu mak ita haree buka kuda musan ba dame iha mundu.

“Ita hatene buat sira-ne’e la’ós fasil, tanba tinan ba tinan organizasaun oioin Nasaun Unida, igreja, Amu Papa, relijiaun sira hotu-hotu ko’alia kona-ba dame. Ha’u halo diskursu rihun ida resin karik, maibé situasaun iha mundu piór liután. Iha rai balun piór liután, la muda hanesan iha Yemen, Síria, Afganistaun, Myanmar no seluk tán,” nia hateten.

Tuir Xefe Estadu, liga ba Timor-Leste nian ne’e nia sempre hato’o beibeik iha komunidade internasionál katak Timor-Leste hanesan nasaun ne’ebé iha pás no trankuilidade.

Prezidente Repúblika, José Ramos Horta, partisipa iha Opening Ceremony, SRI CHINMOY ONENESS-HOME PEACE RUN. iha Palásiu Prezidensiál Nicolau Lobato, Bairru Pité, kuarta (08/02). Imajen Tatoli/Egas Cristovão

“Ita iha Timor sorte, ha’u hateten bebeik ba komunidade internasionál OASIS de tranquilidade. OASIS ne’e  hanesan iha desertu ida iha Áfrika ka Austrália ne’eba, ne’ebé iha desertu bo’ot, derrepente hetan fatin oan ida iha bee, ai-mahon uitoan, ema hotu-hotu ba iha ne’eba ba hemu bee no ba deskansa. Timor hanesan mós OASIS ida dame no trankuilidade iha mundu ne’e no iha ASIA,” nia esplika.

Tuir Laureadu Nobel ba Pas ne’e hateten, tenke  kontinua tanba dame ne’e buat ida osan-mean no tau matan bebeik, se lae bele lakon ka ema ruma bele foti sobu tiha dame ne’e.

“Purtantu, ha’u simu sira Palásiu ne’e povu nian no loke odamatan ba ema hotu-hotu ki’ik no boot, hosi Timor laran no hosi mundu mai,” nia dehan.

Horta dehan, Timor-Leste iha dame besik 100% no problema boot liu iha Timor-Leste la’ós joven sira, dalaruma tuda malu ida ka rua hetan mate no problema boot liu iha nasaun ne’e mak violénsia doméstika mak númeru aas dahuluk iha uma laran liu-liu mane mak baku nia fen.

Nune’e, Timor-Leste la’ós ko’alia bebeik arte marsiál maibé ema individual mak halo problema tanba arte marsiál ne’e nia totál membru rihun ba rihun, no se problema mak arte marsiál entaun probelma loro-loron la hotu rai maibé ema individuál balun mak halo problema.

Tanba ne’e, juventude sira tenke buka fó entertenamentu sira-ne’ebé la estuda tenke tau iha eskola, ida-ne’e mak prioridade dahuluk ba juventude atu estuda no klaru kria empregu.

Sri Chinmoy eziste nu’udar grupu boot ida-ne’ebé hala’o misaun kontribui ba dame iha mundu tomak, no iha tinan 1999 grupu refere vizita ona mai Timor-Leste hodi bele implementa mós programa dame iha Timor-Leste, bainhira Indonézia sei okupa Timor-Leste.

Sri Chinmoy Kumar Ghosel moris iha 27 agostu 1931 no mate iha iha 11 outubru 2007, nu’udar filózofu no profesór iha India ne’ebé sai imigrante iha Amérika iha tinan 1964.

Nia hanesan ema eskritór ida, kompozitór múzika, artista no atleta ne’ebé produtivu. Sri Chinmoy famozu tanba halo promoasaun ba serimónia públiku ho tema “DAME” konxiénsia nian mo armonia mundu nian hanesan halo konsertu dame, meditasaun no kompetisaun halai taru.

Ninia dutrina mak hanorin liu kona-ba servi mundu no toleransia entre relijiaun ne’eb’e ninia baze mak fiar ba Wedanta ninia pensamentu moderna katak fiar ne’e mak Maromak.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!