PNDS sei monitoriza benefisáriu UNP + B iha Suai
COVALIMA, 08 fevereiru 2023 (TATOLI)—Ekipa Programa Nasionál Dezenvovimentu Suku (PNDS) Covalima, sei halo monitorizasaun ba benefisíariu Uma Naroman ba Povu Plus B (UNP+ B) hodi troka zinku feruzen sira ne’ebé implementa ona iha postu administrativu Suai, munisípiu Covalima.
“Ami fó tempu semana ida atu kontinua monitoriza hodi haree benefisíariu sira hahú ona servisu hodi troka kalen fruzen sira ka lae. Tanba ami iha ona kalendáriu servisu fó tempu semana ida,” Diretór PNDS Covalima, Filipe Cardoso, hateten ba Agência Tatoli, iha Covalima, kuarta ne’e.
Tanba, tuir nia, atu hala’o servisu tenke define ho kalendáriu, nune’e bele koloka ekipa enjiñeiru no ekipa hosi munisípiu hodi monitoriza no bele reforsa servisu ekipa sira iha postu administrativu.
Aleende ne’e, atu halo monitorizasaun ba Uma Naroman ba Povu Plus B (UNP+ B) no sei halo mmós monitorizasaun ba projetu Programa Nasionál Dezenvolvimentu Suku (PNDS) regulár ne’e hira no implementasaun UNP segunda faze hira no UNP plus A ne’e hira.
“Iha fulan ne’e sei halo monitorizasaun projetu PNDS regulár hira, implementa UNP faze segundu hira no mós UNP+ A iha postu administrativu Maucatar,” nia informa.
Antes ne’e, iha 02 fulan-fevereiru ne’e Ministru Administrasaun Estatál (MAE), Miguel Pereira de Carvalho ho Vise-Ministru MAE akompañadu hosi ekipa hala’o distribuisaun zinku ba benefisíariu na’in-185 iha postu administrativu Suai, munisípiu Covalima.
Hafoin Governu distribui zinku, benefisíariu sira entuziasmu no hato’o agradesimentu ba Governu tanba polítika VIII Governu KOnstitusionál apoiu zinku hodi troka benefisíariu sira-nia zinku ne’ebé freuzen ona.
Uma Naroman ba Povu Plus B (UNP+ B) implementa iha postu administrativu Suai ho nia suku sira hanesan Debos, Camanasa, Suai Loro, Labarai no Beco ho nia benefisíáriu hamutuk 185.
Jornalista : Celestina Teles
Editór : Cancio Ximenes
