Prezidente Autoridade RAEOA observa kondisaun EBF Kiusisu
OÉ-CUSSE 08 fevereiru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, akompaña hosi Sekretária Rejionál ba Asuntu Edukasaun no Solidariedade sosiál, Avelina da Costa, kuarta ne’e hala’o vizitá ofisiál hodi observa kondisaun Eskola Bázika Filiál (EBF) Kiusisu iha aldeia Ulas, suku Taiboko, sub-rejiaun Pante Makasar.
Durante iha vizita ofisiál ne’e, Arsénio Paixão Bano, enkoraja profesór sira atu hanorin estudante sira ho di’ak no kumpre oras iha prosesu aprendizajen tanba daudaun ne’e tempu udan, estudante balu hela dook no hakat mota.
“Haree kuandu udan lalika movimenta ba mai, ha’u hatene iha Ulas fatin izoladu estudante balu mai hakat mota, entaun profesór sira-ne’ebé hanoin iha eskola ne’e, presiza tau atensaun tanba agora tempu udan, labele husik sira mesak ba uma kuandu iha tempu udan,” Prezidente Autoridade RAEOA fó hanoin ne’e bainhira sorumutu ho profesór sira iha EBF Kiusisu.
Iha biban ne’e, Prezidente Autoridade RAEOA husu estudante sira atu pasiénsia, tanba daudaun ne’e autoridade RAEOA konstrui ona edifísiu eskola foun unidade ida iha aldeia Ulas, nune’e iha furturu bele fasilita ona estudante sira bele asesu ho distánsia besik.
“Estudante ne’ebé mak mai hosi Ulas, imi pasiénsia uitoan lai, ita-nia konstrusaun agora besik remata ona, iha fulan-maiu to’o juñu imi sei kontente ona, atu fasilita imi labele mai dook, imi bele eskola de’it imi-nia bairru laran,” nia apela.
Koordenadór EBF Kiusisu, Luiza Sufa, agradese ba autoridade tanba vizita ona sira iha EBF Ulas, hodi haree diretamente kondisaun eskola ne’e.
“Ami sente konstente tanba ohin Prezidente mai haree direita ami-nia eskola, kondisaun mak hanesan ne’e, loos duni iha EBF Kiusisu akumula estudante 250 maibé balu hela dook tebes, maibé bainhira iha udan ami sempre fó aviza atu hetan akompaña hosi inan-aman sira tanba mota,” nia katak.
Entretantu, totál estudante hala’o estudu iha EFB Kiusisu hamutuk 250 komposta hosi primeiru-anu to’o sestu-anu, ho totál profesór hamutuk na’in-neen.
Jornalista: Abílio Elo Nini
Editór: Evaristo Soares Martins
