DILI, 08 fevereiru 2023 (TATOLI)—Prezidente Repúblika (PR), José Ramos Horta, lori Estadu Timor-Leste nia naran hato’o solidariedade ba povu no Governu Turkia ho Síria ne’ebé hasoru dezástre naturál rai nakdoko.
“Ha’u nia parte halo mensajen no notísia Society Press kompletu liu manifesta transmite ba sira, ita-nia solidariedade no kondolénsia ba povu no Governu Turkia no Síria,” Prezidente Repúblika, José Ramos Horta, hateten ba jornalista sira iha Palásiu Prezidensiál Nicolau Lobato, Bairru Pite, kuarta ne’e.
Xefe Estadu ne’e hateten, rai nakdoko ne’e afeta liuliu ba rai Turkia ho Siria maibé rai seluk tan lubun ida.
“Makas liu iha Turkia ho Síria, sidade balun kuaze monu hotu, edifísiu lubun ida boot no antigu mos monu, ema seidauk hatene númeru loos maibé pelumenus rihun rua liu ona mak mate,” Horta hateten.
Tuir portál ofisiál Antara News ne’ebé Agêencia Tatoli asesu ne’e haktuir, rai nakdoko ho magnitude 7,7 ne’ebé akontese iha segunda (06 fevereiru 2023) iha munisípiu Pazarcik, provinsia Kahramanmaras no provinsia sira seluk hanesan Gaziantep, Sanliurfa, Diyarbakir, Adana, Adiyaman, Malatya, Ormaniye, Hatay no Kilis ne’e, to’o agora rezulta vítima ema mate hamutuk ema 7.826.
Vítima hirak ne’ebé mate impaktu hosi rai nakdoko iha Turkia ho magnitude 7,7 ho númeru ema mate ne’ebé atinje ona 7.826 ne’e, nu’udar númeru kombinadu hosi ema mate iha Turkia ne’e hamutuk 5.894 no 1.932 iha Síria.
Jornalista : Nelson de Sousa
Editór : Cancio Ximenes
