Progresu konstrusaun projetu komunitária iha Covalima atinje ona 75%
COVALIMA, 08 fevereiru 2023 (TATOLI)–Diretór Servisu Edukasaun Covalima, Rui Amarál Suri Seran, hateten progresu konstrusaun projetu komunitária iha Covalima atinje ona 75%.
“Progesu konstrusaun implementa projetu komunitáriu iha munisípiu Covalima atinje ona 75%, tanba durante implementa projetu ne’e la’o ho di’ak,” Rui Amarál Suri Seran hateten ba Agência Tatoli, iha nia kna’ar fatin, Santa Rosa, kuarta ne’e.
Iha projetu komunitária ne’e, MEJD reabilita no konstrui eskola iha Covalima hamutuk 15 no agora ninia progresu atinje ona 75%, tanba eskola hotu ninia reabilitasaun no konstrusaun ramata ona no hein de’it ona atu monta azuleiju.
Dadus jerál ne’ebé iha konstrusaun no reabilitasaun eskola atinje ona 75%, loloos atu monta janela ne’e tarde tanba materiál konstrusaun la sosa iha kualker loja maibé sira tenke sosa iha loja ne’ebé mak define ona atu bele suplay materiál konstrusaun.
Ho nune’e, nia dehan, durante implementasaun projetu komunitária hodi reabilita no konstrusaun eskola iha Covalima hasoru difikuldade mak materiál konstrusaun, tanba sasán la sosa iha kualker loja bainhira iha loja laiha entaun tenke hein fali.
Implementasaun projetu komunitária la’ós la la’o, maibé implementa la’o di’ak tanba ne’e mak sira foti ona osan 75% no hein atu finaliza ona projetu refere.
Bazea ba planu iha sesta (17/02/2023) semana oin, atu halo inaugurasaun ba projetu komunitária iha Covalima tanba foin lalais estabelese ona komisaun halo preparasaun atu inaugura eskola, maibé sei hein oráriu hosi Ministru Edukasaun Juventude no Desportu (MEJD), bainhira fó ona orientasaun bele inaugura iha fulan ne’e.
Tuir dadus hosi edukasaun Covalima konstrusaun no rehabilitasaun ba eskola 15 mak hanesan EBF Holbolu, Laen-Tolu, Maucola, Salasa, Usecai, Soidiga, Aitos, Macocon, Has-Ain, eskola téniku Vokasionál Akar-Laran, Eskola Sekundáriu Jerál Públiku Suai, EBC Zumalai, Fatumea, Traducama konstrui no rehabilita eskola sala-de-aula kompleta ho eskritóriu, armajen no kaza de banho (toilet).
Antes ne’e, iha loron 07 fulan-outubru 2022, Vise Ministru Edukasaun Juventude no Desportu, António Guterres asina kontratu ho grupu komunitária ne’ebé atu konetrui no reabilita eskola 15 iha munisípiu Covalima.
Orsamentu ba reabilitasaun no konstrusaun ba eskola 15 iha covalima ne’e mai hosi orsamentu jerál estadu tinan 2021 ne’ebé prevee iha transferénsia públika hamutuk millaun 1.6, grande projetu nia orsamentu mai hosi rubrika Kapital dezenvolvimentu ne’ebé konstrui eskola CAFE 4.
Jornalista : Celestina Teles
Editór : Cancio Ximenes
