DILI, 08 fevereiru 2023 (TATOLI)–Vise Prezidente Konsellu Kombatente Libertasaun Nasionál (CCLN), Mario Nicolao dos Reis “Marito Reis”, hateten Timor-Leste sei selebra loron nasionál veteranu (03/03/2023) ba dala-VI ho tema “Hametin Unidade ba Dezenvovlimentu Nasionál”.
Notísia Relevante: Komemora Loron Nasionál Veteranu, hametin foinsa’e sira-nia patriotizmu-nasionalizmu
“Iha loron nasionál veteranu nian ne’e ita hakarak hili tau tema ‘Hametin unidade ba dezenvolvimentu nasionál’ ne’e tanba ita hakarak halo apelu ida ba ita-nia lideransa polítika sira tanba to’o agora ita la fortifika ita-nia unidade. Entaun, unidade laiha mak dezenvolvimentu mós laiha, nune’e liuhosi tema ne’e timoroan sira nafatin halo reflesaun no líder sira halo reflesaun ba sira-nia an,” Marito reis hateten ba Agência tatoli, liuhosi telefónika, kuarta ne’e,
Tanba, nia fó hanoin, bainhira dezenvolvimentu atu la’o di’ak iha futuru mak presiza lideransa sira-nia unidade, maibé presiza mós kontribuisaun hosi joven timoroan nian ba dezenvolvimentu iha rai-laran.
“Hotu-hotu tenke hamutuk hodi hametin unidade ba dezenvolvimentu nasionál mak inklui mós ita-nia joven oan sira, tanba sira mak sai futuru ba nasaun ne’e nian,” nia dehan.
Tuir nia, iha serimónia selebrasaun loron nasionál veteran ne’ebé kada tinan selebra iha 03 marsu ne’e, sei konvida mós veteranu sira kada munisípiu na’in-20 kompostu hosi veteranu dezmobilizasaun, inklui mós organizasaun rezisténsia nia emar sira.
Nia informa, orsamentu ba selebrasaun loron nasionál veteran ne’e Governu aloka hamutuk kuaze rihun $250.
Tanba ne’e mak parte relevante sira halo preparasaun loron veteranu nian ne’ebé hetan partisipasaun hosi Vise Ministru Administrasaun Estatál (MAE), Lino de Jesús Torrezão, ne’ebé akompaña hosi Diretór Jerál ba Dezenvolvimentu Administrativu iha MAE, Belarmino Filomeno Neves.
Objetivu hosi reuniaun ne’e, hodi diskute no aprezenta atividade ba preparasaun loron Nasional Veteranu nian iha tinan ida-ne’e.
Atividade sira-ne’ebé atu realiza iha ámbitu Komemorasaun Loron Nasionál Veteranu nian ba dala-VI ne’e sei hahú hosi loron 01 to’o 03 marsu 2023, ho atividade sira-ne’ebé mak komisaun organizadora prepara ona, hahú hosi tarefa kada seksaun ne’ebé prepara ona hosi MACLN.
Seksaun sira-ne’ebé deside ona iha reuniaun preparasaun ne’e mak hanesan sekretariadu, seksaun hosi finansa, protokolu, liturjia, konsumsi, lojistika, mobilizasaun, animasaun, asistênsia médiku, programa no mós sesaun seguransa.
Jornalista : Osória Marques
Editór : Cancio Ximenes
