STAE sei halo edukasaun votante ba eleitór iha Covalima
COVALIMA, 08 fevereiru 2023 (TATOLI)–Sekretáriadu Tékniku Administrasaun Eleitorál (STAE) sei halo edukasaun vontante ba eleitór sira iha Covalima hodi hasa’e taxa partisipasaun iha eleisaun parlamentár.
“Eleitór ne’ebé la partisipa iha eleisaun la’ós kulpa hosi Sekretáriadu Tékniku Administrasaun Eleitorál (STAE), maibé STAE nia esforsu eleitór hotu ativu ba sentru votasaun atu ezerse sira-nia direitu votu. Ita halo edukasaun votante hafoin finaliza halo rekrutamentu ba brigada mak ita halo faziadamente husi suku to’o aldeia maibé depende mós ba orsamentu,” Diretór STAE Covalima, Francisco Gusmão, informa ba Agência Tatoli, iha nia kna’ar fatin, Kampung Baru, kuarta ne’e.
STAE esforsu halo edukasaun votante ba votante sira-ne’ebé hela aldeia, suku no ba estudante sira halo edukasaun eleitorál, nune’e bainhira to’o loron eleisaun sidadaun la ezerse direitu votu iha sentru votasaun ka estasaun votasaun ne’e la’ós STAE nia-sala, maibé sidadaun sira mak la iha konxénsia atu tuir vota iha sentru votasaun.
Ho nune’e, bainhira STAE atu halo edukasaun votante ba eleitór ka sidadaun sira maibé sei hein mós kalendáriu hodi la’o tuir.
“Ita iha kalendáriu mak ita foin la’o tuir ida-ne’e. Ita seidauk halo edukasaun votante tanba sei iha prosesu faze rekrutamentu ba kandidatu brigada sira,” nia hateten.
Oras-ne’e, nia dehan, daudaun ne’e STAE halo ona rekrutamentu no sidadaun ne’ebé submete sira-nia dokumentu ba STAE hamutuk na’in-410,
Hosi númeru ne’e, na’in-383 aplika vaga ba kandidatu brigada no aplika vaga ba pontu fokál na’in-97.
Bazea ba vaga ne’ebé STAE fó sai presiza na’in-107, no hosi númeru ne’e pontu fokál na’in-hitu (7) no brigada na’in-100 hodi prepara ba eleisaun parlamentár.
STAE rekruta brigada na’in-100 ne’e, atu destaka ba iha sentru votasaun no estasaun votasaun ne’ebé mak estabelese ona iha munisípiu Covalima.
Antes ne’e, STAE estabelese sentru votasaun 80 no estasaun votasaun 92 iha Covalima, maibé preparasaun ba eleisaun parlamentár, STAE aumenta sentru votasaun 20 ho nune’e totál sentru votasaun hamutuk 100 ho estasaun votasaun 92 no aumenta ualu (8).
Jornalista : Celestina Teles
Editór : Cancio Ximenes
