DTPSC Covalima kontribui reseita 43,702.00 ba kofre Estadu iha 2022
COVALIMA, 09 fevereiru 2023 (TATOLI)–Diretór Servisu Terra Propriedade Servisu Kadasterál Munisípiu Covalima, Saul Quintão Cardoso, hateten iha tinan 2022 liubá ne’e DTPSC Covalima kontribui reseita 43,702.00 ba kofre Estadu.
“Hahú janeiru to’o dezembru tinan 2022, Dirasaun Servisu Terra Propriedade Servisu Kadastrál Munisípiu Covalima kontribui ona reseita 43,702.00 ba kofre Estadu,” Saul Quintão Cardoso ba Agéncia Tatoli iha-nia kna’ar fatin, Santa Rosa, kinta ne’e.
Reseita ne’ebé DTPSC kontribui ba kofre Estadu iha tinan 2022 ne’e liuhusi fonte arendamentu rai ne’ebé komunidade halo negosiu no kompañia balun okupa barak liu mak okupa rezidénsia iha munisípiu Covalima.
Komunidade okupa rai Estadu hodi kontribui arendamentu rai ba kofre Estadu hanesan iha Covalima barak-liu mak ba negosiante barak liu, maibé uza rezidénsia nia volume arrendamentu ladún.
Maske tinan 2022, Terra no Propriedade Covalima kontribui ona reseita 43,702.00 ba kofre Estadu, maibé sidadaun barak kontribui ativa iha ida-rua seidauk ativa halo kontribuisaun arrendamentu ba Estadu.
“Sidadaun sira selu tarde fulan lima to’o neen, ami haruka karta notifikasaun notifika sira bele selu arrendamentu ba Estadu. Balun mós aplika multa 50% bainhira la selu liu fulan neen,” nia heteten.
Prosesu komunidade halo arrendamentu selu kada fulan, depende medida rai no uma ne’ebé komunidade okupa hanesan sira okupa medida rai boot selu tuir ida-ne’e no uma mós bainhira nia kondisaun di’ak selu tuir ida-ne’e.
Antes ne’e, iha 12 abril 2022, eis Diretór Terra no Propriedade Munisípiu Covalima, Helder Godinho Martins, hateten bazea ba lei númeru 1/2003 ko’alia kona-ba tipu arrendamentu mak hanesan tipu arrendamentu rai Estadu no rai privadu abandonadu hanesan sidadaun Indonézia no portugés husik hela no na’in iha, maibé hela Dili sidadaun seluk okupa entaun terra iha kompeténsia atu administra.
Sidadaun ne’ebé halo arrendamentu ba Estadu selu kiik ba sidadaun ne’ebé okupa rai hodi hela, selu de’it $10.00 to’o $15.00 no halo ema aluga selu $20.00 to’o $30.00.
Ho nune’e, Terra Propiredade Covalima kontribui ona reseita $20.00-resin ba kofre Estadu maibé depende mós sidadaun sira halo arrendamentu hodi selu iha banku.
Tuir dadus hosi Terra no Propriedade Covalima rejista sidadaun selu permanente hodi okupa rai Estadu hamutuk na’in-48 hahú selu iha tinan 2005 to’o ohin loron, no ba sidadaun ne’ebé mak okupa rai privadu hamutuk na’in 20-resin.
Jornalista : Celestina Teles
Editór : Cancio Ximenes
