Governu sei atribui tan sertifikadu títulu na’in ba rai iha Covalima
COVALIMA, 09 fevereiru 2023 (TATOLI)–Ministériu Justisa (MJ) liuhosi Dirasaun Servisu Terra Propriedade Servisu Kadasterál Munisípiu Covalima sei atibui tan sertifikadu títulu na’in ba rai iha Covalima.
“Iha 20 maiu 2022, hala’o ona lansamentu atribui sertifikadu títulu na’in ba rai ba komunidade na’in-tolu (3) no restu ne’e seidauk atribui ba komunidade. Maibé, tuir planu tinan-ne’e sei atribui tan sertifikadu títulu na’in ba rai 10 ba komunidade ida-ne’e planu hosi dirasaun jerál ami hosi munisipiu simu de’it orientasaun mai hala’o tuir,” Diretór Servisu Terra Propriedade Servisu Kadastrál Munisípiu Covalima, Saul Quintão Cardoso, hateten ba Agéncia Tatoli, iha nia-kna’ar fatin, Santa Rosa, kinta ne’e.
Kritéria atribui sertifikadu títulu na’in ba rai ne’ebé Servisu Nasionál Kadastrál (CNC) halo ona levantamentu no halo ona publikasaun durante, fulan tolu ho loron 90 mak foin bele atribui sertifikadu.
Iha Covalima rai sira-ne’ebé sukat ona no halo ona publikasaun mapa hanesan iha postu administrativu sira hanesan postu administrativu Suai, Maucatar balun Tilomar no Zumalai sorin no restu seidauk to’o.
“Bazea ba rezultadu ami enkontru iha dirasaun nasionál tuir planu iha fulan-marsu nia-laran sei atribui sertifikadu títulu na’in ba rai ho fazwadamente,” nia hateten.
Antes ne’e, iha 20 maiu 2022, Governu hala’o ona lansamentu hodi atribui sertifikadu títulu na’in ba rai ba ema na’in-tolu (3) iha munisípiu Covalima.
Jornalista : Celestina Teles
Editór : Cancio Ximenes
