DILI, 09 2023 (TATOLI) – Prezidente Institutu Nasionál Kombate HIV/SIDA, Atanásio de Jesus, informa institutu identifika ona univerdade UNPAZ sai pilotu ba teste HIV/SIDA.
“Eskola ne’ebé ami koordena di’ak ne’e mak eskola universidade da paz no agora daudaun atu sai pilotu ba teste HIV/SIDA iha tinan ida ne’e”, Atanasio de Jesus, dehan iha salaun MSSI Caicoli, ohin.
Nia dehan, pilotu ida ne’e sei fó kapasitasaun ba estudante sira atu halo teste ba HIV/SIDA no oinsá eduka sira hasae sira nia kapasidade bainhira sira tun estajiu, sira bele sosializa informasaun ba komuniddae ligadu ho HIV/SIDA.
“Ami sei fó kapasitasaun ba estudante sira, estudante sira sei koordena no konvense malu atu bele halo teste ba HIV/SIDA, sira ho sira sei eduka fó konesimentu ba malu hodi hasae sira nian kapasidade iha eskola laran, banhira sira ba estájiu KKN sira bele halo sosializasaun ba komunidade tanba universidade kada tinan sempre halo estájiu iha suku, postu no munisípiu entaun ita nia alvu ne’ebé di’ak bele sosilaiza informasaun ba populasaun sira. Entaun ida ne’e mak ita kolabora hela ho universidade atu bele servisu hamutuk ho ita”, nia esplika.
Nia afirma, tinan ida ne’e Institutu Nasionál hakarak atu implementa programa ne’e maibé orsamentu la sufisiente tanba propoen miliaun ida maibé realidade Governu aloka orsamentu kiik, maibé tempu badak sei implementa pilotu ida ne’e.
Nia subliña, ema ne’ebé afeta moras HIV/SIDA durante 2003 to’o 2022 hamutuk 1.776 no mate hamutuk 270-resin.
Husi tinan 2003 mai to’o iha kuarter datoluk 2022, ema ne’ebé afeta HIV/SIDA hamutuk 1.776 husi númeru ne’e ema ne’ebé mak mate hamutuk 270-resin no ema ne’ebé agora daudaun halo tratamentu hamutuk 856.
Jornalista : Felicidade Ximenes
Editór : Zezito Silva
