Kliníka Daitula Baucau halo atendimentu pasiente iha uma
BAUCAU, 09 fevereiru 2023 (TATOLI) – Klínika Veteranu David Alex ‘Daitula’ Baucau kontinua hala’o monitorizasun no atendimentu ambulante ba kodisaun saúde pasiente veteranu iha uma área postu Baucau vila.
Koordenadór klínika veteranu David Alex ‘Daitula’ Baucau, Leonel Guterres, esplika, klínika veteranu refere parte hosi Ospitál rejionál Eduardo Ximenes (HoREX, sigla Portugés) ne’ebé halao kna’ar hanesan klínika ambulante liuliu fó tratamentu no atendimentu espesiál ba veteranu ne’ebé sofre moras iha área munisípiu Baucau.
“Bainhira veteranu sira hosi munisípiu seluk halo tratamentu (baixa) depois sei iha área Baucau, klínika ne’e sempre vizita hodi observa pasiente nia kondisaun,” Koordenadór klínika veteranu David Alex ‘Daitula’ Baucau, Leonel Guterres hateten iha Vila Antiga, kinta ne’e.
Klínika Daitula halao funsaun utiliza sistema saúde kuidadu primária hanesan durante tratamentu deteta kazu gravé presiza kontinua ba HoREX no bainhira iha ospitál rejionál menus rekursu sei kontinua halao tratamentu ikus iha Ospitál Nasionál Guido Valadares (HNGV, sigla portugés).
Durante fulan-janeiru klínika refere hala’o vizita hodi halo tratamentu veteranu hamutuk na’in-haat komposta hosi feto na’in-tolu no mane na’in-ida maihosi munisípiu Viqueque na’in-ida no Baucau na’in-tolu ne’ebé presiza kontinua hala’o observasaun durante rekupera saúde iha uma.
“Idade idozu hotu nune’e afeta hosi kondisaun fíziku tanba labele halo movimentu nune’e ita ba observa sira-nia kondisaun saúde jerál iha uma,” Leonel Guterres akresenta.
Parte dirijente klínika laiha oráriu permanente hodi halo vizita maibé bainhira hetan informasaun hosi konsellu veteranun Baucau pesoál saúde sira direitamente ba observa hafoin oras normál serbisu remata tuir kondisaun pasiente nian.
Klínika veteranu Baucau hamutuk funsionáriu hamutuk na’in-16 kompostu permanente na’in-ualu kompostu hosi médiku na’in-haat, enfermeiru na’in-rua, farmasista na’in-ida no administrasaun na’in-ida, kontratadu na’in-haat kompostu médiku na’in-rua, enfermeiru, dentista no voluntáriu na’in-rua hanesan resepsionista no enfermeira.
Jornalista : Natalino Belo
Editór : Evaristo Soares Martins
