Klínika Daitula Baucau rejista moras tensaun aas 180

BAUCAU, 09 fevereiru 2023 (TATOLI) – Klínika Veteranu David Alex ‘Daitula’ Baucau  durante fulan-janeiru rejista pasiente veteranu hamutuk 180 mak sofre moras tensaun aas.

Koordenadór klínika veteranu David Alex ‘Daitula’ Baucau, Leonel Guterres, esplika, pasiete ne’ebé rejista iha fulan-janeiru hamutuk na’in-1.361 komposta hosi veteranu na’in-800 no 500-resin hosi komunidade ne’ebé mai hosi munisípiu lima hanesan Ainaro, Ermera, Bobonaro, Lautem, Viqueque, Manatuto no Baucau.

“Ita rejista kazu barak liu maihosi ita-nia aman veteranu sira mak tensaun aas,” Koordenador klínika veteranu Daitula Baucau hateten iha Vila Antiga, kinta ne’e.

Hosi totál pasiente hirak-ne’e maioria sofre moras hanesan rematizmu hamutuk 113, pulmaun króniku ka TBC 196, tiroik 40, nehan 185, estomak 26, ISPA 175 no diabetes 15.

Klínika veteranu mós halo rekomendasaun pasiente hamutuk na’in-15 hala’o operasaun iha Ospitál Rejionál Eduardo Ximenes (HoREX, sigla portugés) komposta hosi operasaun boot nain-ida no kiik na’in-14.

“Ita hato’o ba entidade ne’ebé relevante ho veteranu atu fasilita ekipamentu balun hanesan oklu hodi sira haree netik rai ne’e,” Leonel Guterres akresenta.

Pesoál saúde iha klínika iha fulan-janeiru deteta pasiente hamutuk na’in-114 sofre moras tensaun ne’ebé deskansa durante oras haat nune’e kontinua fó atendimentu antes rekupera no iha pasiente balun iha kontinua halao tratamentu iha HoREX Baucau.

Klínika veteranu Baucau hamutuk funsionáriu hamutuk na’in-16 komposta hosi permanente na’in-ualu hanesan médiku na’in-haat, enfermeiru na’in-rua, farmasista na’in-ida no administrasaun na’in-ida, kontratadu na’in-haat kompostu médiku na’in-rua, enfermeiru, dentista no voluntáriu na’in-rua hanesan resepsionista no enferemeira.

Jornalista    : Natalino Belo

Editór           : Evaristo Soares Martins