VIQUEQUE, 09 fevereiru 2023 (TATOLI)— Ministériu Obra Públika (MOP) liuhosi Institutu Jestaun Ekipamentu (IGE,I.P) atu normaliza no hasai sedimentasaun iha ponte Welolo, suku Luca, postu adiministrativu Viqueque-Villa, munisípiu Viqueque tanba mota tuun bee halai tuir fali estrada hodi difikulta movimentasaun transporte públiku.
Xefe suku Luca, Privato Amaral Guterres, informa daudaun ne’e ponte Welolo nakonu ho sedimentasaun, nune’e iha tempu udan mota tuun la tuir dalan hodi fó impkatu ba movimentu ema no transporte públiku.
“Antes ne’e, Institutu Ekipamentu Jestauu, Institutu Públiku (IGE,I.P) mai halo tiha normalizasaun, maibé agora tempu udan mota tuun beibeik, nune’e rai henek taka tiha ponte okos, nune’e mota halai tuir estrada ne’ebé difikulta ba movimentu ema no transporte,” hateten Privato Amaral Guterres, ba Agência Tatoli via telefónika, kinta ne’e.
Ho kondisaun ponte ne’e, nia dehan fó impkatu mós ba estudante husi Eskola Báziku Filiál (EBF) Welolo tanba tempu udan estudante labele ba eskola tanba estrada sira nakonu ho bee.
Iha fatin seluk,Xefe suku Dilór, Jacinto Ximenes, hatutan ponte Welelo mós difikulta hotu ba populasaun sira husi suku Dilór rasik ne’ebé uza hotu dalan ne’ebá.
“Ha’u husu parte relevante sira tenke mai halo normaliza hodi labele difikulta ita nia-populasaun sira-nia movimentu sira-ne’e,” nia afirma.
Iha tinan 2022 ekipa IGE,I.P konsege hasai tiha sedimentasaun ka rai henek ne’ebé taka tomak ponte okos hodi mota halai tuir dalan.
Hatan ba kestaun ne’e, Diretór Serbisu Obra Públika, Munisípiu Viqueque, Mario do Rego, dehan iha tempu badak ekipa sei tuun ba foti dadus hodi bele aprezenta dadus bai ha nasionál hodi bele mai halo normalizasaun no hasai sedimentasaun.
“Ponte Welolo agora sedimentasaun nakonu, ne’ebé ha’u haruka ekipa MOP hodi ba haree no hasai tiha dadus maka relata ba nasionál hodi normaliza. Tanba ami laiha kapasidade finanseiru hodi rezolve sedimentasaun sira iha ponte Welolo”. nia hato’o.
Jornalista :Vitorino Lopes da Costa
Editór :Florencio Miranda Ximenes
