Reabilitasaun Estádiu Munisipál Dili, FFTL-FIFA hein kontratu hosi SEJD
DILI, 09 fevereiru 2023 (TATOLI) – Prezidente Federasaun Futeból Timor-Leste (FFTL) Francisco Jerónimo, dehan FFTL ho Federation International Football Assosiation (FIFA) hein kontratu hosi Sekretaria Estadu Juventude no Desportu, hafoin halo reabilitasaun ba Estádiu Munnisipál Dili.
“Agora ami hein hela kontratu hosi SEJD atu fó mai ami, kontratu ne’e mai los ona, ami sei halo prosesu hamutuk ho FIFA atu hahú haree dezeñu atu halo re-abilitasaun ba estádiu ne’e rasik”, Francisco dehan ba Agência TATOLI iha Palasiu Governu, ohin.
Nia hatutan, estudu atu halo reabilitasaun ba estádiu, FIFA finaliza ona iha tinan kotuk no hein de’it legalidade hosi Governu ho FFTL.
“Kontratu ne’e foin lalais ha’u koalia ona ho SEJD, sira mós esforsu atu halo lalais kontratu ida fó ba ami oinsa bele hahú ona prosesu sira, bainhira buat hotu los ona konkursu internasionál loke, FIFA mak loke empreza internasionál mak sei kaer nia prosesu hotu”, nia relata.
Rai ho Estádiu Munisipál Dili, Ministériu Justisa (MJ) atribui ona ba SEJD iha tinan kotuk no agora daudaun kontratu arendamentu SEJD mak iha direitu absoluta atu entrega ba FFTL no FIFA.
Jornalista: Hortencio Sanchez
Editór : Zezito Silva
