SEII-UN Women asina akordu konstrui uma mahon iha Gleno
DILI, 09 fevereiru 2023 (TATOLI) Sekretariu Igualdade Inkluzaun (SEII), Maria do Rosário Fátima Correia, hateten sei konstrui uma mahon iha Gleno, munisípiu Ermera inklui mini muzeu iha SEII nia rezidénsia, Matadoru, Dili.
“Ami asina memorandu ne’e ba tinan tolu nia-laran diferensa ho UN Women Timor-Leste antes ne’e tanba baibain sira apoiu ami-nia atividade oinsá halo prevensaun violénsia bazea ba jéneru. Maibé, agora ne’e sira ajuda SEII konstrui uma mahon iha Gleno no mós fó orsamentu atu estabelese mini muzeu ba partisipa feto sira-nian iha tinan 1975 to’o daudaun ne’e,” SEII ba jornalista sira, hafoin asina memorandu ho UN Woman, iha salaun Maria Gorete, Matadouro, Dili, ohin.
Sekretária Estadu ne’e hatutan, UN Women sei apoiu atividade koordenasaun violénsia bazea ba jéneru hodi implementa Planu Asaun Nasionál (PAN).
Governante ne’e hatutan konstrusaun fatin rua ne’e nia montante rihun $150 maibé sira tékniku sei halo hela dezenu ba uma rua ne’e.
Tuir nia, asina ona klaru katak konstrusaun atu la’o maibé karik la konsege halo tanba mandatu besik ona atu konklui, nune’e hein katak Governu tuir mai sei kontinua hodi halo konstrusaun uma mahon ba feto, portadór defisiénsia no LGBTI sira sai vitima ba violénsia.
Konstrusaun mini muzeu ne’e foin ba dahuluk SEII hetan ajuda hosi UN Women maibé dezde Timor-Leste restaura independénsia UN Women ajuda SEIl ba halo atividade lubuk ida ona.
Xefe UN Women iha Timor-Leste, Nishtha Satyam, hateten kustu ba konstrusaun rua ne’e UN Women hein proposta orsamentu hosi SEII, tanba presiza halo fatin seguru ba feto sira no asina memorandu ne’e kontinuasaun SEII ho UN Women Timor-Leste.
“Kustu ba konstrusaun uma mahon no mini muzeu, ami sei hein proposta orsamentu hosi SEII no ami sei apoiu ida-ne’e no ami sei harii uma mahon standar global, tanba feto sira mai hosi fatin la seguru, prepara fatin seguru ba sira. Ami prontu ho SEII dezde ami hala’o misaun iha Timor Leste iha 2000 no ida-ne’e atu haforsa tan ami-nia parseiru ho SEII,” nia dehan.
Jornalista : Osoria Marques
Editór : Cancio Ximenes
