Top

Abitante Caicoli na’in-283 naran la tama lista Cesta Bázika

Xefe suku Caicoli, Hipolito Ximenes Marques. Imajen TATOLI/Egas Cristóvão

DILI, 10 fevereiru 2023 (TATOLI)—Xefe suku Caicoli, postu Administrativu Vera Cruz, munisípiu Dili, Hipólito Ximenes Marques, hateten abitante iha suku Caicoli na’in-283 mak sira-nia naran la tama lista Cesta Bázika maibé lista hirak-ne’e iha ona Ministériu Turizmu no Indústria nian.

“Lista iha MTCI ne’ebé hein de’it bainhira mak distribui Cesta Bázika ne’e ba ita-nia populasaun ne’ebé seidauk hetan direitu ne’e,” nia dehan ba Agência Tatoli iha nia kna’ar fatin, Sede Suku Caicoli, sesta ne’e.

Aleinde ne’e, nia haktuir, iha mós família foun sira-ne’ebé rejistu iha Caicoli hamutuk 308 no lista naran ida-ne’e mós iha ona MTCI.

Nia hateten, iha aldeia Tahu-Laran ema na’in-50 naran laiha lista MAE nian, ne’ebé mak seidauk simu, reklamasaun ba família foun hamutuk 20 no simu ona Cesta Bázika ne’e hamutuk 1.021.

Iha aldeia Divino 12, ema na’in-62 naran la tama iha lista MAE nian, reklamasaun ba família foun iha na’in-80 no ema ne’ebé simu ona Cezta Bázika hamutuk 1.199.

Iha aldeia Sacoco ne’e, nia dehan, ema na’in-64 naran la tama iha lista MAE nian, na’in-34 mak família foun, na’in-tolu mak ho nia rendimentu ka saláriu liu $500 no ema ne’ebé mak simu Cezta Bázika ne’e hamutuk 748.

Aldeia Sentru Unidade iha ema na’in-63 mak la tama iha lista MAE nian, na’in-43 mak família foun no sira-ne’ebé simu ona ne’e hamutuk 1.303, iha aldeia FohoRai-Boot iha ema na’in-44 mak naran la tama iha lista MAE nian, família foun iha 128 no ema ne’ebé simu ona ne’e hamutuk 1.550.

Relasiona ho programa distribuisaun Cesta Bázika, liuhosi Ministériu Turizmu, Komérsiu no Indústria ne’ebé kontratu ho kompañia Pinamor Unipesoál, Lda, distribui iha suku Caicoli, kompostu hosi aldeia lima (5) hanesan Sentru Unidade, Divino 12, Sacoco, Tahu Laran no Fohorai-Bo’ot.

Totál benefisiáriu ka populasaun iha Caicoli hamutuk 5.831, ne’ebé rezultadu ekipa distribui ona produtu Cesta Bázika iha aldeia lima (5) ho totál benefisiáriu hamutuk 5.821 de’it, ne’ebé distribuisaun hala’o durante loron 10 nia laran.

Jornalista : Osoria Marques

Editór        : Cancio Ximenes

Publisidade

Leave a Reply

Latest Post

error: Content is protected !!