Janeiru 2023: dezastre naturál estraga agrikultór 1.402 nia toos
COVALIMA, 10 fevereiru 2023 (TATOLI)–Diretór Servisu Agrikultura Munisípiu Covalima, Domingos Gusmão hateten, dezastre naturál ne’ebé akontese iha fulan-janeiru 2023 ne’e estraga agrikultór 1.402 nia toos batar ho nia luan 781,03 iha Covalima.
“Foin-lalais ita-hotu hatene, anin boot durante semana tolu hodi estraga toos batar ne’ebé ami-nia tékniku sira identifika, agrikultór iha postu administrativu haat afeta ba dezastre naturál hanesan postu Tilomar, Maucatar, Fatumea no Fatululik ho luan área 781,03 ho total agrikultór afetadu 1,402,” Domingos Gusmão hateten ba Agência Tatoli, iha-nia kna’ar fatin, Tabakolot, sesta ne’e.
Hafoin tékniku sira identifika toos batar ne’ebé hetan estragu hosi dezastre naturál, nia mós hato’o kedas relatóriu ba Administradór Munisíspiu Covalima, Francisco de Andrade no Ministériu Agrikultura no Peska (MAP).
“Ha’u hanoin buat-ida dezastre naturál ita-labele sees, bainhira udan monu rai. Ita-hotu hatene tinan-tinan bainhira udan ona sempre hamosu inundasaun no afetadu ba agrikultór sira-nia toos batar sira,” nia dehan.
Dadus ne’ebé tékniku identifika dezastre naturál ne’ebé afetadu ba agrikultór sira-nia toos batar ho luan área 781,03 ho totál agrikultór hamutuk 1,402 ne’e, hosi postu administrativu sira hanesan Tilomar ho luan área 62,25 ho agrikultór afetadu 134, Maucatar luan área 272,7 ho totál agrikultór 475, Fatululik luan área 373,63 ho total agrikultór 628, Fatumea luan área 73,45 ho totál agrikultór 165.
Jornalista : Celestina Teles
Editór : Cancio Ximenes
