Negosiánte faan karreta iha espasu públiku tenke iha Dealer
DILI, 10 fevereiru 2023 (TATOLI)–Adjuntu Prezidente Autoridade Munisípiu Dili (AMD), António Moniz Clau, hateten negosiante ka abitante ne’ebé halo atividade negósiu faan karreta iha espasu públiku obrigatoriamente tenke iha Dealer rasik.
“Ami halo hela koordenasaun ho komandu Polísia Nasionál Timor-Leste (PNTL) munisípiu Dili no iha semana ida liubá ne’e ita halo avizu ida ba sidadaun hotu-hotu ne’ebé faan karreta ho motór iha jardin sira iha estrada ibun katak, obrigatoriamente sé mak faan karreta motor tenke iha surat Dealer, nune’e AMD bele kontrola ho di’ak. Tanba, ema individu defisil hodi nune’e okupa fali fatin públiku sira no halo engarafamentu ba movimentasaun transporte sira,” António Clau hateten ba Agência Tatoli liuhusi telefónika, sesta ne’e.
Tanba ne’e, nia dehan, AMD ho PNTL munisípiu Dili hahú halo prepasaun hodi orienta negosiante faan karreta iha espasu públiku ne’e bele faan iha fatin provizóriu ne’ebé Governu prepara ona.
“Depois ita la tolera ita-nia komunidade ne’ebé uza jardin ka estada públiku hodi faan karreta no motor, maibé ida-ne’e ita halo hela preparasaun hodi halo ekipa konjunta ida atu tuun hodi halo halo sensibilizasaun. Ita sei orienta sira mak dahuluk tenke iha Dealer, ne’e hakarak ka lakohi. Ita fó hela fatin provizoriamente ba faan na’in sira mak iha Caicoli (edifísiu eis finansa) nian ne’e, neste momentu ema uitoan de’it mak iha ne’ebá, entaun ita mobiliza sira hodi faan iha fatin ne’ebá,” nia esplika.
Iha tempu besik sei halo sensibilizasaun maibé Autoridade Munisípiu Dili (AMD) sei koordena ho komandu Polísia Nasionál Timor-Leste (PNTL) munisípiu Dili nian, nune’e bainhira halo sensibilizasaun tenke akompaña ho PNTL.
Nia dehan, orientasaun sira-ne’e bazea ba dekretu-lei númeru 33/2008, ida-ne’e mak sei regula hodi ema labele faan karreta no motór iha dalan públiku no jardin sira.
Antes ne’e, AMD fó orientasaun beibeik ba autoridade lokál hodi haree atividade sira ne’e maibé dala ruma mós komunidade ne’ebé faan ne’e nunka rona autoridade lokál sira-nia orientasaun.
“Tanba ne’e mak ita servisu hamutuk ho Dirasaun Nasionál Transporte no Terrestre ho PNTL hodi tun no haruka faan iha fatin ne’ebé Estadu no Governu prepara ona no tenke iha Dealer mesak, ne’e tenke iha,” nia dehan.
Durante ne’e, AMD observa katak abitante ne’ebé faan karreta ne’e mesak faan individual de’it no maiória mak seidauk iha Dealer.
“mensajen ba ita-boot sira katak tenke iha responsabilidade hodi kria kondisaun fatin própriu maibé obrigatoriamente tenke iha Dealer. Tanba bainhira ema ida sosa karreta ho motór liu ona rua ba leten signifika tenke trata ona Dealer. Tanba ita iha kapasidade sosa karreta ho motór entaun tenke halo mahon ida bá,” niadehan.
Jornalista : Osoria Marques
Editór : Cancio Ximenes
