Projetu reabilitasaun estrada rurál tinan 2022 iha Baucau foin hahú
BAUCAU, 10 fevereiru 2023 (TATOLI) – Projetu reabilitasaun estrada rurál hamutuk pakote lima tinan 2022 iha munisípiu Baucau foin hahú mobilizasaun ekipamentu iha inisiu tinan-2023 ne’e.
Diretór Serbisu Munisipál Obra Públika Baucau, Pedro Guterres, esplika, estrada pakote lima refere fahe pakote hanesan iha área hanesan diresaun postu Quelicai, suku Baguia ba Laculiu, Letemumu, Lelali no Abulir hamutuk kilómetru 6.5, pakote Bercoli ba Badomori hamutuk kilómetru 2 no pakote postu Laga ba Daelari kilómetru 2.3.
“Foin mak hahú enkontru mobilizasaun ho autoridade postu no suku sira nune’e foin mak hahú realiza,” Diretór Serbisu Munisipál Obra Públika Baucau informa Agensia TATOLI iha Vila Nova, sesta ne’e.
Projeitu reabilitasaun estrada hirak-ne’e tuir planu realiza iha fulan-novembru tinan-2022 maibé tanba autoridade postu inklui suku sira okupadu ho implementasaun programa hanesan cesta bázika, Programa Mão de Obra Postu Administrativu (PMOPA), subsídiu fim-do-ano nune’e inísiu tinan 2023 mak foin hahu implementa projeitu refere.
Pakote dahuluk hahú hosi suku Baguai, Letemumu, Lelalai no Abulir respnsável hosi kompañia Meqxa unipesál lda no Jatono unipesóal lda responsável hosi kilómetru 2 too 4 no kilómetru 4 to’o 6.5 responsável hosi kompañia Debeingracia unpesoal lda.
Pakote reabilitasaun hosi suku Bercoli ba Bahamori, postu administrativu Venilale responsável hosi kompañia Jomar unpesoal, lda hamutuk kilómetru 0 to’o 2 kilómetru no kilómetru 2.3 hosi Laga ba Daelari responsável hosi kompañia Rozi unipesóal lda.
“Ita foin introdús ba autoridade lokál sira hanaran enkontru mobilizasaun nune’e autoridade sira koñese kompañia, estrutura no planu serbisu,” Pedro Guterres akresenta.
Totál orsamentu ba pakote lima hosi kilómetru 10.5 hamutuk millaun $2-resin ho durasaun kontratu hamutuk tinan-ida.
Jornalista : Natalino Belo
Editór : Evaristo Soares Martins
