Reabilitasaun estrada rurál Lokeu ba mota Tafara iha faze ateru rai
COVALIMA, 10 fevereiru 2023 (TATOLI)–Diretór Servisu Obra Públika Munisípiu Covalima, Alberto Cardoso, informa prosesu reabilitasaun estrada rurál hahú hosi Lokeu, suku Debos, postu Suai ba mota Tafara, suku Dato-Tolu, aldeia Natardik, bairru Lakalese ho distánsia kilometru tolu (3) to’o ona iha faze ateru rai.
“Agora nia progresu tama 50% resin ona, sira-nia CCO mós aprovadu ona maibé hein orsamentu iha sistema halo pagamentu. Tanba prosesu reabilitasaun estrada agora ami haree kompañia faze konstrusaun valeta no hada moru protesaun ne’e atinje ona kilometru tolu. Tuir mai, sei ateru hodi nune’e estrada bele di’ak liután no ateru sei uza rai ne’ebé kualidade la uza kualker rai hodi ateru estrada refere,” Alberto Cardoso hateten ba Agência Tatoli iha resintu AMC, Sukaer Laran, sesta ne’e.
Hafoin konstrui valeta ho distánsia kilimetru tolu no moru kontensaun dadaun ne’e kompañia hala’o servisu to’o ona iha faze ateru estrada rurál ho rai.
Kompañia Holpilat Unipesoál, Lda, reabilita estrada rurál hahú hosi Lokeu, suku Debos, postu Suai ba mota Tafara, suku Dato Tolu, adeia Natardik, bairru Lakalese hahú implementa iha inisíu dezembru 2021, maibé kompañia foin hahú reabilita estrada iha juñu 2022.
Ho nune’e, iha tinan 2023 kompañia finaliza ona konstrui baleta ho distánsia kilometru tolu no hada moru protesaun ho total orsamentu $371,196,19, no agora foku de’it ateru rai ba estrada hodi halo di’ak liután.
Jornalista : Celestina Teles
Editór : Cancio Ximenes
