Vítima inséndiu iha Becora halo ona tratamentu espesializadu iha ICU
DILI, 10 fevereiru 2023(TATOLI) – Xefe Departamentu Emerjénsia iha Hospitál Nasionál Guido Valadares (HNGV), Eldegar Lopes dehan vitíma inséndiu iha Becora halo ona tratamentu espesializadu iha Intesive Care Unit (ICU) iha HNGV.
“Vítima Joana Soares ho idade 45 ne’ebé ahi han iha Becora, daudaun ne’e halo ona tratamentu espesializasaun iha intesive Care Unit (ICU) iha Hospitál Nasionál Guido Valadares (HNGV)”, Eldegar Lopes, informa ba TATOLI iha nia kna’ar fatin HNGV, ohin.
Nia konta, vitíma ne’e horseik mai ospitál, médiku sira halo kedas intervensaun no fó tratamentu kedas.
“Vítima ne’e mai HNGV, ami haree ahi han hotu nia isin, entaun ami halo kedas intervensaun hamoos no halo kurativu depois hodi hasai nia raan halo analiza no fó kedas aimoruk antibíotiku atu labele infesaun”, nia esplika.
Vítima nia kondisaun bele dehan 40% ladún di’ak tanba isin hotu ahi han, entaun ida ne’e mak sei halo tratamentu nia-laran.
“Banhira ho kodisaun ahi han ne’e, ita bele dehan 40% promostiku ladún di’ak, maske horseik vitíma mai kondisaun di’ak, nia tur ho han di’ak maibé ami evita labele han barak atu labele iha komplikasaun”, nia konklui.
Jornalista : Felicidade Ximenes
Editór : Zezito Silva
