Padre Vigáriu Jerál Arquediozese husu pasiente fó konfiansa ba profisionál saúde
DILI, 11 fevereiru 2023 (TATOLI) – Padre Vigáriu Jerál Arquedioseze Dili, Graciano dos Santos Barros, hateten ohin selebra loron mundiál ba ema moras, tanba ne’e husu ba pasiente sira tenke laran metin no fó konfiansa ba profisionál saúde sira, atu bele fó atendimentu ne’ebé di’ak.
“Ohin loron ita selebra loron mundiál ba ema moras sira, tanba ne’e haú husu ba pasiente sira, atu laran metin no fó konfiansa ba médiku no enfermeiru sira, atu sira servi ho domin loloos, atu nune’e bele fó atendimentu ne’ebé di’ak ba ita boot sira ne’ebé moras iha fasilidade saúde sira hotu, iha teritóriu nasionál”, Padre Vigariu Jerál Arquediozese Dili, Graciano dos Santos Barros dehan ba jornalista sira bainhira konklui misa agardesimentu ba loron mundiál ema moras iha HNGV, ohin.
Nia informa, pasiente sira tenke kolabora ho pesoál saúde sira, atu fó atendimentu di’ak tanba sira mak sai salva guarda ba ema moras sira.
“Tanba ne’e husu ba profisionál saúde sira nafatin servisu ho fuan no laran hodi servi pasiente sira ne’e ho di’ak, tanba ita bo’ot sira mak salvadór, nune’e nafatin servi pasiente sira ne’ebé mak presiza imi nia tulun”, nia husu.
Diretór Ezekutivu Hopsitál Nasional Guido Valadares (HNGV), Alito Soares, informa ohin selebra loron mundiál ba ema moras ba dala XXXI ho tema kuidadu pasiente sira tanba sira mak sai sentru ba tratamentu.
“Entaun ho mensajem ida ne’e naturalmente ba profisionál saúde sira atu toma ema pesoál nia reponsabilidade hodi kuidadu ema moras sira nia saúde to’o di’ak”, Alito Soares dehan.
Nia esplika, HNGV hanesan servisu kuidadu tersiáriu ne’ebé mak iha Timor-Leste, entaun ho tratamentu ida ne’e presiza kuidadu krítiku iha nível espesializada no sub espesializada sira, maibé ho limitasaun rekursu no ekipamentu médiku ba pasiente sira ne’ebé mak baixa kama la sufieiente tanba pasiente hotuhotu husi ospitál referál lima husi munisípiu inklui sentru saúde iha Dili mai hotu iha ne’e difisil atu akumula.
“Ho esforsu HNGV nian, ita nafatin loke espasu oituan atu nune’e bele fó atendimentu hotu ba pasiente sira ne’ebé mak presiza hetan atendimentu husi espesialista sira”, nia informa.
Nia konta katak tinan 10 liuba, ita la iha espesializada maibé to’o agora ita espesialista hamutuk 63 no ita mós agora daudaun atu harii tan fatin pediatra andar lima no ICCU
“Ho selebrasaun loron mudiál moras sira, ita iha progresu bo’ot ba tinan 10 liuba atu dehan katak durante ita halo transferénsia ba rai liur barak tebes, inklui fase raan, maibé agora daudaun ita halo ona tratamentu iha rai-laran, espera katak ba futuru ita sei halo tratamentu ba moras kankru no moras fuan iha ita nia-rain” nia konklui.
Jornalista : Felicidade Ximenes
Editór : Zezito Silva
