APC rejista uma 18 hetan estragu iha semana ida nia-laran
DÍLI, 13 fevereiru 2022 (TATOLI) – Diretór Relasaun Externa no Komumikasaun Autoridade Protesaun Sivil (APC, sigla portugés), Anacleto Caetano, dehan hahú iha 6 to’o 12 fevereiru 2023, APC rejista uma komunidade 18 mak afeta ba dezastre naturál.
“Durante semana ida Autoridade Proresaun Sivil (APC) rejista dezastre naturál hosi munisípiu ualu (8), hosi dezastre naturál ne’e uma komunidade hamutuk 18 mak afetadu”, Diretór Relasaun Externa APC, Anacleto Caetano hateten ba jornalista sira iha edifisiu APC Caicoli, segunda ohin.
Iha Munisípiu Ainaro, Postu Hato-Udo, Suku Leo-lima, Aldeia Goulou, iha loron 08 fevereiru 2023, akontese anin sobu komunidade nia uma ida Munisípiu Covalima, iha Postu Maucatar, Suku Oges, Aldeia Horum, iha dia 08 fevereiru 2023, akontese udan-bo’ot no halo bee tama iha komunidade ida nia uma no uma refere hetan estragu.
Iha Munisípiu Dili, iha loron 9/2/203, mosu dezastre ahi han uma iha Suku Becora, Postu Administrativu Cristo Rei, Munisípiu Dili iha família 14 mak afeta ba inséndiu refere.
Iha Munisípiu Ermera, Postu Ermera Villa, Suku Poetete, Aldeia Líkisé, iha 10 fevereiru 2023, mosu dezastre naturál anin-bo’ot, halo ai-tohar, hanehan komunidade nia-uma ida.
“Husi akontesimentu ne’e ita-nia alin feto ida, ho idade (7) lakon vida tanba kauza hosi ai-monu hanehan uma, entaun, labarik ne’e la konsege salva vida”, Anacleto subliña.
Iha Munisípiu Liquiça, Postu Administrativu Liquica Villa, Suku Daru-Lete, Aldeia Cai-Leli, iha dia 08 fevereiru 2023, akontese anin-boot, sobu komunidade nia uma hamutuk neen.
Iha loron 7/2/ 2023 mosu dezastre naturál iha Munisípiu Lautém, Postu Lautém, Suku Pairara, Aldeia Puno, akontese anin-boot no sobu komunidade nian ida,
Iha loron 08 fevereiru, iha Munisípiu Manufahi, Postu Alas, Suku Uma-Berloic, Aldeia Colocau, akontese anin-boot no sobu komunidade sira nia uma hamutuk neen.
Iha loron 11 fevereiru 2023 mosu dezastre naturál iha Munisípiu Viqueque, Postu Lacluta, Suku Dilór, Aldeia Tula-Oli, ahi-han komunidade nia uma ida.
“Hafoin akontesimentu, ita-nia Komandante Operasaun Autoridade Protesaun Sivil Munisípiu sira ne’ebé ha’u temi ohin ne’e, sira halo kedan levantementu iha ida-idak nia munisípiu atu iha momentu ne’e kedan ita fó kedas apoiu emerjénsia bá vítima sira hotu. Apoia ba vítima hirak ne’e, hanesan ha’u dehan food no non food”, Anacleto haktuir.
Nia dehan, ekipa APC no autoridade lokál kontinua halo hela levantamentu ba komunidade sira ne’ebé afeta ba dezastre naturál hodi halo verifikasaun fali bá uma sira ne’ebé hetan estragu.
“Nune’e ita bele identifika loloos uma hirak hetan estragu kaman, hira mak estragu liu, nune’e vítima sira bele hetan apoiu ba rekooperasaun”, Anacleto informa.
Jornalista: Natalino Costa
Editór : Zezito Silva
