iklan

NASIONÁL, EKONOMIA, HEADLINE

Empreza importadora deside haruka fila kontentór tanba laiha kapasidade selu taxa

Empreza importadora deside haruka fila kontentór tanba laiha kapasidade selu taxa

Chairman Timor Port, Rafael M. Ribeiro./Tatoli

LIQUIÇÁ, 13 fevereiru 2023 (TATOLI) – Diretór Timor Port, Rafael Ribeiro, informa empreza importadora balun deside haruka fila kontentór ne’ebé mai ho sasán bá fali nasaun orijen tanba laiha kapasidade selu taxa.

“Kona-ba hasa’e taxa, laiha relasaun ho Portu Tibar tanba ne’e Governu nia planu. Iha fulan-janeiru 2023, iha problema uitoan tanba kontentór barak mak [empreza] sira kansela ne’ebé volume ne’e iha impaktu uitoan. Espera katak iha fulan tuirmai bele rekupera fali”, Diretór Timor Port hatete ba Agência Tatoli, iha Portu Baía Tibar, segunda ne’e.

Nia esplika katak iha importadór balun lakohi selu taxa tanba sa’e maka’as, “entaun sira-nian kontentór balun tau hela iha armazein to’o agora seidauk foti. Foti de’it mak sasán ne’ebé sira selu”, ezekutivu ne’e dehan.

Nia hatutan bainhira empreza importadór sira atu lori sai fali kontentór, jestór portu husu atu sira koordena ho Governu, liuliu Autoridade Aduaneira/Alfándega. “Kuandu lori sai sira nafatin selu tanba uza fasilidade portu nian, maibé selu taxa sira lakohi maka sira deside haruka filafali”, nia dehan.

Tarifa ne’ebé fó sai hosi Portu Tibar katak kontentór ho kapasidade 10 feat ho valór $53 no mamuk $42, kontentór ho kapasidade 40 feat selu $106 no mamuk $84.

Kontentór ne’ebé mak atu lori fila hamutuk hitu no na’in mak husi empreza Timor Food, Star King, Fortuna Loro-sa’e no Natural Supply.

“Dadaun sira trata hela prosesu ne’e ho Alfándega kona-ba kontentór sira ne’ebé atu haruka fila”, nia realsa.

Jerente Empreza Timor Food, Jeckie Jong. Imajen Tatoli/ Antónia Gusmão.

Iha sorin seluk, Jerente Empreza Timor Food, Jeckie Jong, hatete seidauk iha informasaun katak sira sei haruka fila kontentór tanba laiha kapasidade selu taxa.

“Ha’u seidauk rona ida ne’e, más depois ha’u konfirma. Iha tinan 2023 ne’e, foin hatama kontentór rua ne’ebé tau sasán hanesan masin-midar”, nia afirma.

Nia salienta katak relasiona ho selu taxa durante ne’e laiha problema no tuir regra foun ne’ebé Governu introdús, liuliu hasa’e impostu seletivu konsumu.

Tuir dadus husi Ministériu Finansa, durante fim trimestre 2021 ka outubru to’o dezembru, Autoridade Aduaneira arrekada ona reseita hamutuk millaun $20,4 husi Portu Dili, kompara ho operasionalizasaun Portu Baía Tibar ne’ebé hahú iha 30 setembru 2022, durante fim trimestre 2022 ka outubru to’o dezembru, koleta reseita hamutuk millaun $33,4.

“Signifika durante periódu fim trimestre 2021 no 2022 iha aumentu iha kolesaun reseita mai kofre Estadu kuaze millaun $13. Ho mudansa operasaun husi Portu Dili ba iha Portu Baía Tibar fasilita lais liután movimentu importasaun no esportasaun sasán. Portu foun ne’e inklui ka’is ida ho bersu rua ne’ebé uza hodi redus atrazu iha tempu libertasaun kontentór inklui kustu tranzasaun atu fasilita efisiénsia servisu alfandegáriu no atividade komérsiu”, nota haktuir.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!