Estrada aat halo konstrusaun UNP iha Wairoke-Soba-Fatuk Makerek paradu

DILI, 13 fevereiru 2023 (TATOLI)—Xefe Unidade Planeamentu no Implementsaun iha Progama Nasionál Dezenvolvimentu Suku (PNDS), Flávio Amaral, hateten to’o agora udan no dalan aat mak impede implementasaun Uma Naroman ba Povu (UNP) tinan 2021 nian iha suku Wairoke, Soba no Fatuk Makerek paradu.
Notísia Relevante: Konstrusaun Uma Kbiit Laek 2021 atinje ona 97%
“Ita koko halo aproximasaun no loke dalan ba tiha to’o ne’ebá, maibé udan mai sobu fila-fali entaun difisil ita atu halo implementasaun UNP ne’e rasik. Udan fó impaktu tebes mak iha suku Wairoke, Luro nian no suku Soba, Postu Laga nian no iha suku Fatuk Mmakerek iha Laclubar, nune’e fó impaktu ba ita-nia implementasaun. To’o agora razaun risku ba transporte atu tama no distánsia hosi área ne’ebé mak atu ba to’o iha ne’ebá ne’e karreta kamioneta de’it labele tama satán tempu iklima udan la fó fatin,” nia dehan ba Agência Tatoli, iha Komisun Nasionál Eleisaun (CNE), Colmera, segunda ne’e.
Nia dehan, inísiu parte ekipa hahú halo servisu maibé bainhira kee atu halo udan mai sobu no nune’e hela de’it, entaun to’o agora seidauk bele halo implementasaun.
“Ita bele dehan seidauk hahú halo implementasaun mak uma unidade13,” nia dehan.
Ministru Administrasaun Estatal (MAE), Miguel Pereira de Carvalho, hateten iha tinan fiskál 2021, MAE liuhosi PNDS konstrui UKL hamutuk 1.254 ne’ebé nia progresu iha munisípiu hotu la’o di’ak no hetan apresiasaun boot hosi komunidade rasik hetan benefísiu direta.
Tan ne’e, iha tinan 2022, Governu liuhosi Ministéiru Finansa aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hotu-hotu, tanba redusaun 75 % hosi orsamentu ne’ebé aloka iha tinan ida-ne’e.
“Deputadu sira propoin tan osan hamutuk miliaun $63,6 hodi MAE liuhosi PNDS bele implementa Uma Kbiit Laek iha 2022, aumenta uma 10 kada suku nune’e programa ida Governu prontu atu implementa ne’e.” nia dehan.
Jornalista : Osória Marques
Editór : Cancio Ximenes

