Estudante 645 hosi Baucau submete dokumentu atu asesu bolsa hakbiit
BAUCAU, 13 fevereiru 2023 (TATOLI) – Kandidatu estudante universitáriu hamutuk na’in-645 hahú submete dokumentu hodi hetan bolsa hakbi’it no parsiál iha munisípiu Baucau.
Diretór servisu rekursu umanu iha munisípiu Baukau, João Bosco Ximenes, esplika, programa ne’e realiza bainhira Ministériu Ensinu Superiór, Siénsia no Kultura (MESSK) serbisu hamutuk ho administrasaun munisipál Baucau hodi halo rekrutamentu ba kandidatu estudante universitáriu tanba hakarak apoia estudante ne’ebé valór boot, maibé laiha kbiit atu kontunua nia estudu iha universidade.
“Ha’u hanoin programa ne’e bele fasilita ita-nia komunidade sira ne’ebé kbiit laek, laiha forsa atu selu sira-nia oan nia eskola atu ba universidade,” Diretór servisu munisipál rekursu umanu Baucau hateten iha Vila nova, segunda ne’e.
Liuhosi ekipa tékniku Fundu Dezenvolvimentu Kapitál Umanu (FDCH-sigla portugés) hamutuk ho administrasaun munisípiu Baucau, hahú simu dokumentu kandidatu hosi estudante ba bolsa hakbiit no parsiál períodu tinan-2023, hosi loron 06-13 fulan fevereiru hosi postu administrativu neen kompostu Baucau vila, Baguia, Laga, Quelicai, Venilale no Vemasse.
Kriteriu importante hanesan kandidatu sira hosi bolsa hakbiit mak estudante finalista sekundária tinan letivu 2017, ho valór mínimu 6.0. Enkuantu bolsa parsiál tinan letivu 2022 ho valór mínimu 7.5 ba leten no sei halo selesaun iha nasionál antes anunsia rezultadu iha munisípiu.
Governu sei finansia hanesan benefisiáriu ba bolsa hakbiit sei apoia fundu ba propina, hela fatin, inklui akomodasaun no ba benefisiáriu parsiál sei apoia osan hodi selu propina.
Tuir planu, MESSK sei halo rekrutamentu ba benefisiáriu estudante universitáriu hodi hetan apoia bolsa hakbiit hamutuk rihun tolu nune’e bele kompleta meta VIII governu nia mandatu durante tinan-tolu.
Jornalista : Natalino Belo
Editór : Evaristo Soares Martins
