Governu laiha koñesimentu tarifa transporte públiku Suai-Dili $15.00
COVALIMA, 13 fevereiru 2023 (TATOLI)–Ministériu Transporte no Komunikasaun (MTK) liuhosi Dirasaun Nasionál Transporte Terrestre (DNTT) Covalima laiha koñesimentu kona-ba tarifa transporte públiku Suai-Dili $15.00.
Notísia Relevante: Na’in ba Autokarro Suai ezije Governu konstrui terminál iha Covalima
“Ami mai atu asegura desizaun ne’ebé Ministériu Transporte no Komunikaun (MTK) ne’ebé aplika tarifa autokarro (bus) Suai-Dili ho $12.00, maibé durante ne’e na’in ba autokarro (bus) sira aplika tarifa Suai-Dili $15.00 ne’e ilegál. Ita aplika lei haree mós kondisaun karik motorista ho paasajeiru iha konkordánsia to’o iha uma laiha kestaun,” Diretór Nasionál Transporte Terrestr Covalimae, António da Costa, hateten ba jornalista sira hafoin diskute ho autoridade Covalima no na’in ba autokarro (bus) sira iha Covalima, iha salaun AMC, Sukaer Laran, segunda ne’e.
Durante halo diskusaun ho na’in ba autokarro sira aplika tarifa transporte públikue Suai-Dili $15.00 ho razaun laiha terminál no mós motorista bus sira hatun pasajeiru to’o iha sira-nia uma. maibé bainhira Governu konstrui terminál iha Covalima, sira kontinua aplika tarifa bus $15.00 bainhira DNTT simu keixa sei halo prosesu.
“Governu aplika tarifa bazea ba diploma ministeriál no sei matein tarifa bus Suai-Dili ho $12.000 la’ós $15.00, ita la’o tuir lei maibé ida aplika $15.00 depende ba negosiasaun. Ami foin rona tarifa bus Suai-Dili $15.00, maibé bazea ba despaixu ne’e $12.00 de’it,” nia dehan.
Bazea ba Diploma Ministeriál númeru 2/2003 /MTC, 3 outrubru no diploma ministeriál númeru 013/2012, 13 juñu, sirkulasaun transporte públiku Suai-Dili $12.00.
Administradór Munisípiu Covalima, Francisco de Andrade, konsidera durante ne’e na’in ba autokarro Suai-Dili viola tarifa hodi aplika $15.00, maibé bazea ba diploma ministeriál tarifa $12.00.
“Karta mai hosi forsa umanista durante ne’e bus na’in-sira viola diploma ministeriál ne’ebé fó sai iha tinan 2015, aplika tarifa bus Suai-Dili kada ema-ida $12.00. Maibé ita-boot sira halo manipulasaun kada ema-ida $15.00. Ohin, oportunidade di’ak ita hotu tuir regra ne’ebé iha, tanba lei mak regula ita no moris iha lei nia okos, labele halo tuir ida-ida nia vontade,” nia hateten.
Bazea ba karta ne’ebé Forsa Umanista sujere tarifa $7.00, maibé ida-ne’e Ministériu kompetente mak foti desizaun tanba aplika tarifa normál $12.00.
Na’in ba Autokarro (bus), Zelia Moniz, hateten nia parte aseita tarifa hosi Governu ne’ebé fó sai bus Suai-Dili $12.00 maibé Governu tenke konstrui terminal iha Covalima ne’e.
“Atu salva pasajeiru sira agora presu mina (gazolina) mós sa’e maibé ami aseita tarifa $12.00 hosi Suai ba Dili maibé tenke iha terminal,” nia dehan.
Tuir dadus hosi Dirasaun Transporte Terrestre no Komunikasaun Covalima rejista total autokarro (bus) hosi Suai–Dili ne’e hamutuk-51.
Jornalista : Celestina Teles
Editór : Cancio Ximenes
