Komisaun F deteta menus profisionál saúde afeta ba atendimentu pasiente
DILI, 13 fevereiru 2023 (TATOLI) – Prezidenete Komisaun F ne’ebé trata asuntu Saúde, Seguransa no Igualdade Jéneru, Noe da Silva, dehan fiskalizasaun ne’ebé komisaun halo hatudu katak postu saúde, sentru saúde no ospitál sira iha munisípiu sei iha problema barak hanesan menus profisionál saúde, fasilidade no seluk tan ne’ebé afeta ba atendimentu pasiente sira.
“Ami durante ne’e halo fiskalizasaun iha munisípiu sira, haree ba ospitál sira, postu saúde no sentru saúde sira sei nafatin iha problema bo’ot, hanesan medikamentu, ekipamentu saúde no mos profisionál saúde sira sei menus, atu atende pasiente sira ne’ebé mak moras, tanba ne’e ami husu atu hadia kualidade atendimentu ida ne’e ho di’ak ba futuru”, Prezidente Komisaun F Noe Silva, hateten bainhira debate urjénsia ho Ministériu Saúde iha PN, ohin.
Deputada Bankada Fretilin Lidia Norberta, husu ba Ministériu Saúde atu hadia atendimentu iha ospitál sira tanba iha semana kotuk inan ho bebé mate iha dalan bainhira halo transferénsia husi ospitál referál Maliana mai Dili.
“Ha’u preokupa ho situasaun ne’ebé akontese iha semana kotuk katak inan no oan ne’ebé mak lakon vida iha kareta ambulánsia husi Maliana mai Dili maibé dalan klaran bebé mate uluk no to’o HNGV inan mate tuir, entaun ho situasaun ida ne’e husu MS presiza tau atensaun ba kualidade atendimentu iha ospitál sira”, Lidia Norberta afirma.
Deputadu Bankada PD, Adriano do Nasimento preokupa katak kazu inan no bebé mate iha kareta ambulánsia la’os foin akontese, tanba ne’e profisionál saúde sira tenke fo atendimentu ne’ebé kualidade ba pasiente sira.
Hatan ba preokupasaun hirak ne’e Ministra Saúde, Odete Maria Freitas Belo, informa ba oin sei hadia atendimentu ne’ebe di’ak ba popualasaun sira iha Timor-Leste.
“Ha’u atu ko’alia de’it kona-ba inan no bebé ne’ebé mak mate iha semana kotuk bainhira halo trasnferénsia husi ospitál referál Maliana mai HNGV. Inan moras komplikasaun, hanesan moras hepatitis B pozitivu no bebé moris ho permatur foin 28 semana moris ona maibé ita la konsege salva tanba ne’e ami mós presiza tau atensaun ba ida ne’e. Maibé kazu ne’e prosesu investigasaun lao hela iha tempu badak sei informa”, nia konklui.
Jornalista : Felicidade Ximenes
Editór : Zezito Silva
